Shillong, Naiwieng 30
Ka Inter Miami ka la lah ban pynthikna ban jam sha ka final ha ka Major League Soccer (MLS) Cup ha ka sien kaba nyngkong eh ha ka step jong ka sngi U Blei hadien ba ka la lah ban pynliem noh ïa ka New York City FC da 5-1 kol ha ka ‘playoff’ jong ka Eastern Conference.
U Tadeo Allende u la khur ïa ka hat-trick, katba ïa kiwei pat pat la pynbud da u Mateo Silvetti bad u Telasco Segovia n aka bynta ban pynthikna ba ka Miami kan rung sha ka jingïakhun nam lahduh jong ka MLS ha ka sngi saitjaiñ jong ka taïew ban wan ha Fort Lauderdale.
Te kumta ka Miami, kan pdiang ïa ka kynhun kaba jop ha ka phainal jong ka Western Conference, kata ka Vancouver Whitecaps, kaba la pynliem ïa ka San Diego FC da 3-1 kol kaba la long ha kajuh hi ka sngi.
U Lionel Messi lem bad ki para nongïalehkai jong u kin leit sha kata ka jingïalehkai da ka jingsngew skhem hadien kawei pat ka jingïalehkai ba ka la jop da 4-0 kol ïa ka FC Cincinnati.
U Allende, uba la thep ar kol ban pynjop pyrshah ïa ka Cincinnati, sa shisien pat u la long u rangïalehkai ba kynsai na ka bynta ban pynlong ïa ka Miami ban kamai point.
Une rangïalehkai shakhmat ba dang 26 snem na Argentina u la thep ïa ka kol kaba nyngkong ha ka minit kaba 14 hadien ba ka New York ka dangthmu ban pynap da ka ‘offside’ ïa kane ka kynhun. Une u rangïalehkai u la thep biang ïa ka kol kaba ar jong u ha ka minit kaba 23 hadien ba u rangapkol ka New York u Matthew Freese um shym la lah ban kem ïa ka bol ha ka corner.
Hadien shiteng kynta ka New York ka la lah ban pynphai kylla shi kol lyngba u Justin Haak, uba la pyndei da ka khlieh hadien ba u Maxi Moralez u la shut ïa ka free-kick ha ka minit kaba 37 bad haduh kaba kut jong ka kylla step ka Miami ka dangtam da 2-1 kol.
Ka New York ka la nangkiew ha ka jingsngewskhem bad ka la pyrshang ban pynïakhaid ha ka minit kaba 66 haba u Nicolas Fernandez u la pynbuh bol na ka bynta u Julian Fernandez hapoh ‘box’, hynrei kane ka jingpyrshang kam shym la urlong na ka daw ka jingiashan tyngeh u rangapkol ka Inter u Rocco Rios Novo.
Hashwa ban wai u Segovia u la ïoh ban thep ïa ka kol kaba saw na ka bynta ka Miami ha ka minit kaba 83 hashwa ba u Allende un khur syndon ïa ka hat-trick bad ban ïoh syndon ïa ka jingjop.
