Mawkyrwat, Naiwieng 30
Ha kawei ka jingjia kaba sngewsih, uwei u khynnah uba la tip kyrteng kum u Eveningstar P Marak uba dang 12 ne 13 snem ka rta u la hap na jrong ka bos kaba dang ïaid bad u la khlad noh hashen.
Katkum ki tyllong khubor ba la ïoh lum, la ïathuh ba ki pulit ha ka 29 tarik u Naiwieng, 2025 ha ka por kumba 11:48 baje mynstep ki la ïoh jingtip lyngba ka phone ba ka don ka jingjia aksiden ha Lower Puksora, Ranikor Block, South West Khasi Hills District ba uwei u khynnah shynrang u la hap na jrong ka bos bad ka bos ka la tylliat nalor jong u bad la lap ïa une u khynnah ba u la ïap ha katei ka jaka.
Shuh shuh katkum ka jingtohkit ki pulit ka Gumaghat, la ïathuh ba une u khynnah u la ïeng ha ka foot board jong ka bos bad bat shiliang ka kti ïa u nar jong ka bos hynrei kumno re kumno u la kum bakla bad u la hap na ka bos bad ka shaka (tyre) kaba shadien kaba sha kadiang ka la ïoh ban tylliat ïa u.
Ha kaba ïadei bad katei ka jingjia, ki pulit ki la kurup noh ïa katei ka bos bad ka jingtohkit haduh mynta ka dang ïaid shakhmat.
