Shillong, Naiwieng 30
Ka Meghalaya Police F.T ka la hap ban durut da kaba tyngeh na ka bynta ban pynliem ïa ka Mawka -siang da 3-2 kol ha ka SSA Champions Cup kaba la long ha ka sngi Saitjaiñ ha SSA Stadium kaba ha First Ground, Polo.
Ka jingïakhun ka long ba dei pynban ka Mawka-siang kaba la lah ba kan tam shakhmat da shi kol, ba la thep da u Robertson Khongriah (34), ïa kaba ka MLP ka la ïoh pat ban pynphai kylla da ki ar kol kiba la thep da u snar thep kol u Pynshailang Lyngkhoi (47 & 53).
Hadien kane, u Jonathan Kharbani (64), u la ïoh ïa ka kabu ksiar ba paka ban lah ban pynïakhaid ïa kane ka jingïakhun na ka bynta ka Mawkasiang.
Katba u Everywell Khongjee (81), u la ïoh ïa ka kabu kaba paka na ka bynta ka MLP ban thep ïa ka kol kaba lai, kaba kylla long artad ka kol, ka ban pynlong ïa ka kynhun ban khur syndon ïa ki lai point.
Ka jingïakhun lada shim kyllum, lehse ka rukom ïalehkai ka noh sha ka kynhun ïalehkai jong ka Mawkasiang, kaba na ka por sha ka por, ka la lah ba kan ñion bha shakhmat bad ban da tynjuh bor ïa ka MLP.
Kane ka rkom ïalehkai bha ka Mawkasiang, ka la sdang ba kan tynjuh borbah bha bad sdang pynklumar jingmut ïa ki rangïalehkai ka MLP, kaba na ka jingbym lah ban tehlakam ïa ka bol ha ki khep kiba donkam bha, ka pynlong ïa ka bad ki kato katne ki rangïalehkai ban ïoh pdiang ruh ki yellow card na u referee, ha kaba kane ka la ktah jur bha ïa ka kum ka kynhun hadien ba u Niawkorlang Kyndiah, u la bteng ban ïoh ïa ka yellow card kaba ar bad ban shah beh syndon shabar ka madan ha ki khyllipmat ba ka jingïakhun ka la khreh ban jam sha kaba kut.
Kumban shu pynpaw hangne ba ka kynhun ïalehkai ka Mawkasiang kaba long ka lahduh ha ka U-20 Fourth Division, ka la lah ban pynpaw ïa ka jingtbit ha kane ka lympung ïalehkai jong ka Champions Cup bad ki rangïalehkai jong ka, ki la sdang ban pynklumar jingmut ïa ki rangïalehkai ka MLP.
Shuh shuh ka jingnang ka Mawkasiang ban shim kylliang (on-loan) ïa ki san ngut ki rangïalehkai ka Mawlai SC ban ïarap ban pynkhlaiñ ïa la ka kynhun, ka long sa kawei pat ka dawbah, kaba pynlong ïa ki, kum kawei na ki kynhun na ki kyrdan ba kham rit, ba kin kyntiew bad lah ban ïalehkai bha ha kane ka kynti kaba mynta.
Da kane ka jingjop, kan pynlong ïa ka MLP ba kan kiew mynta ha ka kyrdan ba halor duh jong ka Group-A hadien ba ka la khur 6 point, ha kaba ka ïa ryngkat bad ka Langsning FC tangba ka jingïapher ka dei ha ka jingthep kol.
Ki jingïalehkai ki ban wan jong kane ka lympung kan dei ha ka lah sngi U Blei ha kane ka jingïakhun jong ka Group-A kin long hapdeng ka Umlyngka pyrshah ïa ka Mylliem Lum ha ka por 1 baje nohphai sngi bud pat sa ka jingïakhun jong ka Group-B hapdeng ka Nongkseh pyrshah ïa ka Mawlynrei ha ka por 4:30 janmiet.
