Shillong, Naiwieng 30
Ka Kong Joplyne Shylla kaba dei ka President jong ka Meghalaya Pradesh Mahila Cong-ress ka la ïathuh ba ki don ki konstitwensi kiba ïaknieh tiket haduh 4 ngut ki kyrtong kiba kwah ban ïakhun ïa ka ilekshon MDC ha Garo Hills Autonomous Distri-ct Council (GHADC).
Ka la ïathuh ba ka Congress ha rilum Garo ka la pynkhreh shait shait ban wad kyrtong na ka bynta ka ilekshon MDC ka ban sa long ha u snem ban wan.
Ka la ïathuh ba mynta ki don bun ngut kiba la wan pan tiket hynrei ka MPCC kan sa jied ïa ki kyrtong kiba don jingkyrmen ban jop.
Shuh shuh ka la ïathuh ba ki paidbah ha rilum Garo ki la rai beit ban jied ïa ka Congress naduh ba ki la jied ïa u kyrtong Congress ha ka ilekshon MP Lok Sabha.
Ka la ïathuh ba wat u Zenith Sangma uba dei u para jong u Dr. Mukul Sangma ruh u la wanphai sha ka Congress bad kane ka pyni ba ki paidbah ki la ieid ïa ka Congress.
Shuh shuh ka la pynpaw ba ha ka ilekshon shiteng samoi, ki jop beit ki seng ba don ha ka Sorkar namar ki thom da ka bor katba ha ka ilekshon paidbah ki seng ba don ha Sorkar kim lah ban thom da ka bor namar hap ïa mareh lang baroh ki konstitwensi.
Ha kajuh ka por ka la pyntip ba ka Congress kan sa pynbna ïa ki kyrtong dei tad ynda ka Sorkar ka la pynbna ïa ka tarik thep vote.
