Shillong, Naiwieng 30
Ki nongshong shnong ka Khliehmyntriang hapoh ka jingïalam u Bah Bring Dkhar bad u Bah Lektor Dkhar ki la leit ban buh da ka dorkhas ha u Deputy Secretary ka Jaiñtia Hills Autonomous District Council (JHADC) ban dawa buh noh ka tarik ban pynlong ïa ka ilektion jied Waheh Shnong ba thymmai hapoh ka shnong Khliehmyntriang.
Haba kren sha ki lad pathai khubor u Bah Lektor u la ong ba ka shuki Waheh Shnong ka la kut naduh ka 23 tarik Risaw (October) 2025.
“Kane ka jingpynslem ban jied ïa u Waheh Shnong ka pynduh jingmyntoi ïa ki nongshong shnong naduh ki kot ki sla, ki skhim bad ki projek Sorkar, ha kaba ki nongshong shnong kim lah shuh ban ïoh lada ym don u Waheh Shnong,” la ong u Bah Lektor.
U la pyntip ruh ba ha jingïakren, na ka liang u Deputy Secretary ka JHADC, u la kular ban pynkloi ïa kane ka kam.
U Bah Lektor u la ong ruh ba ka jingleit jong ki sha District Council, kadei da ka sur ki nongshong shnong namar ki nongshong shnong ki ïa soi lang ha kane ka momerandum.
