Shillong, Naiwieng 30
U Bah Moslander Marngar uba dei u Chairman jong ka Meghalaya Commercial Truck Owners and Drivers Association (MCTODA) u la pyntip ba ki nongïalam ki dang pynbeit ïa ka sngi ban khot jingïalang ïa ki nongñiah bad trai trok ban shim ïa ka rai hadien ba ki la dep wan ïakynduh ïa u Symbud Myntri Rangbah ka Jylla u Bah Sniawbhalang Dhar ha Secretariat kaba long mynha ka 27 tarik mynta u bnai.
Haba ïakren lyngba ka phone bad u Bah Moslander u la ïathuh ba ka jingïalang ha ka 26 tarik mynta u bnai kaba la long ha Mawryngkneng ka la shim ïa ka rai ba lada urlong ne ym urlong haba leit ïakynduh ïa ka Sorkar kin sa khot biang ïa ka jingïalang paidbah.
U la ïathuh hadien ba la mih na ka jingïalang bad ka Sorkar ki para dkhot ki la ai jingmut ba kim dei ban khot kyrkieh ïa ka jingïalang namar don ki bym lait haba ki la leit kit mar sha kiwei ki Jylla, kumta u la hap ïapynbeit bha bad ki para nongïalam ban buh ïa ka sngi kaba kylluid khnang ba ki dkhot baroh kin ïoh ban wan ïashimbynta.
Shuh shuh u Bah Moslander u la pyntip ba ha kane ka jingïalang yn sngap ïa ka rai jong ki dkhot la ki kwah ne em ban ïapynbeit bad ki kompeni dewbilat ban pynbeit ïa ka bai kit.
U la ong lada ka sur na ka jingïalang ki shim ïa kano-kano ka rai kum u nongïalam un pdiang beit namar ma u, u dei tang u Chairman uba la thung da ki paidbah.
U la pyntip ba u Bah Sniawbhalang u la ong ba un sa pynmih ïa ka jingpynbna ban ai ïa ka dor kaba 9 tyngka shi kilometre hynrei la bthah ruh ban ïa pynbeit ruh bad ki kompeni.
U Bah Moslander u la pyntip ba ki don ki mat kiba ka seng ka la rah kiba la urlong bad don ki mat ki bym pat urlong kaba kin sa ïakren ha ka jingïalang paidbah.
