Shillong, Naiwieng 30
Ka Sorkar Meghalaya ka la pynmih ïa ka kyndon treikam ne ka ‘Standard Operating Procedure’ (SOP) haba ïadei bad ka jingpynbeit ryntih ïa ka jingpyndonkam ïa ki ïit-ïong, ki ‘siren’, ‘beacon’, bad ki jingthoh kyrteng ne ki ‘Name Plate’ ha ki kali Sorkar.
Katkum ka SOP, tang kito ki kali kiba don ha ka thup kyrdan ‘Z-Plus’ bad ‘Z’ ba la ai jingmut da ka komiti Sorkar ki lah ban pyndonkam ïa ki ïit-ïong na ka bynta ka jingshngaiñ.
Ïa ki ‘siren’ pat, lah ban pyndonkam tang da ki pulit, ‘Emergency Services’, bad ki kali VVIP/VIP.
Ha kajuh ka por, la khang ban pyndonkam ïa ki ‘beacon’ ne ki lait-saw kiba don ne bym ki jingpynthaba ne ‘flasher’, katkum ka jingpynbna na ka tnad Transport.
Ka SOP ka batai ruh ïa ki kyndon na ka bynta ki jingthoh kyrteng ne ki ‘Name Plate’ ha ki kali bad ki nar sieh lama ne ‘Flag Rod’ na ka bynta ka lama ri.
Katkum ka paragraph 3.44 jong ka ‘Flag Code of India, 2002’ (kumba la pynkylla) la shah ïa kine ki heh ki haiñ harum ban wah ïa ka lama ka ri ha ki kali Sorkar ba ki pyndonkam.
Kine ki kynthup ïa ka President, Vice-President, ki Lat bad ki Lieutenant Governor, Khlieh ka Mission/Posts, Myntri Rangbahduh, Kynhun Myntri, Myntri Khynnah, Deputy jong ka Union, Myntri Rangbah bad ka Kynhun Myntri jong kano-kano ka Jylla ne Union Territory, Lamphang ka Lok Sabha, Shongknor jong ki Legislative Council ha ka Jylla, ki Lamphang jong ka Legislative Council ha ki Jylla, ki Lamphang jong ki Ïingdorbar Thawaiñ ha ki Jylla bad ki Union Territory, Symbud Shongknor jong ki Legislative Council ha ki Jylla, Symbud Lamphang jong ki Ïingdorbar Thawaiñ ha ki Jylla bad ki Union Territory, Chief Justice ka India, Nongbishar ka Supreme Court, Chief Justice jong ki High Court, Nongbishar jong ki High Court.
“Kane ka SOP kan treikam ha ka jingpyndonkam ïa ki kali jong ka Sorkar Meghalaya na ka bynta ki kam ka Sorkar, lait noh ki kali ba ïadei bad ki kam ba kyrkieh kumba la batai ha ka Motor Vehicles Act, 1988 (kumba la pynkylla). Kane ka OM kan treikam mardor,” ong u Commissioner & Secretary, Bah CVD Diengdoh.
Shuh shuh kane ka SOP ka long katkum ka jingpyntreikam ïa ki rai jong ka Supreme Court bad ka Motor Vehicles Act, 1988 (kumba la pynkylla).
