Shillong, Naiwieng 30
Ki Khun ka Balang Presbyterian Pyndensohsaw, Shillong ha ka 30 tarik u Naiwieng 2025, ki la pynlong ïa ka jingïaseng rakhe ‘Advance Christmas’ kum shibynta ka jingïakynduh lang baroh, kaba la long ha National Dorbar Hall, Mawkhar.
Ha kane ka sngi jingrakhe ïa ka ‘Advance Christmas’ la sakhi ba ki khun ka Balang Presbyterian Pyndensohsaw kiba sah ha Nongbah Shillong, kynthup ruh na kiwei pat ki Balang kiba la shah khot sngewbha, ki la wan ban ïa shim bynta shitrhem bad ruh la ïadon lang u Tbn.PS.Raimon.
Ban pyniphuh iphieng ïa ka jingrakhe, ka la don ruh ka jingrwai, ki jingput jingtem bad ka jingshad na ki khun samla ka Balang ba sah ha Nongbah Shillong bad ruh na ki samla na kiwei pat ki Balang kiba la shah khot sngewbha ha kane ka sngi.
Ki Khun ka Balang Presbyterian Pyndensohsaw, Shillong man la u snem ki ju pynlong ïa ka jingrakhe lehkmen ka ‘Advance Christmas’ kaba long kum shibynta ban ïakynduh lang baroh ki khun jong ka Balang kiba sah ha Nongbah Shillong.
Lah ban kdew ba ka kynhun ki Khun ka Balang Presbyterian Pyndensohsaw ba sah ha Shillong, ka la dap mynta la 11 snem tam eiei ban sharki hangne ha Nongbah Shillong.
Kum ka dak ban ai ka jingkitbok kit rwiang ïa ka jingtrei shitom jong ki samla rangbah kiba la don bynta naduh ba la seng nyngkong ïa ka kynhun jong ki Khun ka Balang ha Nongbah Shillong, u Tbn.P.S.Raimon u la pynkup burom ïa ar ngut, ba kynthup ïa u Bah F.S.Raimon uba la shongthaid na ka kam Chairman bad u Bah Section Syiemlieh uba la shongthaid na ka kam Secretary ha kajuh kapor ruh uba la bat teng ïa ka kam Vice Chairman ha ki snem ba la dep.
Hadien ba la pynkupburom, u Tbn.P.S.Raimon u la ai ïa ki kyntien kitbok kit rwiang ïa kine ar ngut kiba la treishitom naduh ba sdang haduh kane ka kynti ba mynta, ba kin dangiai bteng ban shakri ïa ka kam jong u Blei ha ki snem ban wan baroh, khnang ba ka kynhun jong ka Balang kaba don ha Nongbah Shillong kan dangshit rhem ban dangiai kiew shaphrang ha ka jingshakri ïa u Blei.
La ïoh ruh ka jingot ïa u cake ‘Advance Christmas’ hadien ba la wai ka jingïaseng.
