Mawkyrwat, Naiwieng 30
Ka Khasi Student’s Union (KSU) Mawkyrwat Circle ha ka sngi Saitjaiñ ka la plie pyrda ïa ka lympung ïalehkai phutbol ba tip kum ka 3rd Maitsha-phrang Under-16 Football Tournament 2015-26 halor ka phang “Em ïa u Drok” ha madan Rowell Lyngdoh Stadium, Maw-langwir South West Khasi Hills District.
Ka jingpynlong ïa kane ka lympung ïalehkai ka long kum shi bynta ban plie lad ïa ki samla kiba dangkhie san ha ki kam ïalehkai bad khnang ba ki lah ban kiar ïa ki jait jingdih ba sniew bapher bapher khamtam ïa u drok.
Ha kane ka sngi sdang, ka jingïalehkai ka la long hapdeng ka Pynnoh Riwar Sports Academy pyrshah ïa ka Mawten Sports Club.
Haba phai sha kane ka jingïalehkai ka la long kaba itynnad bad ïakhaid bha ha kaba ha kylla step baroh ar ki kynhun kim shym la lah ban pynkhih jar.
Haba bteng ïa ka jinglehkai ha ka kylla miet, ka Pynnoh Riwar ka la lah ban ïalehkai bha bad pynpher ruh ïa ka rukom ïalehkai bad dei ha ka minit kaba 52 ba ka la ïoh ïa ka kabu kaba biang ha kaba u Dangïai Pyrkhat Khardewsaw u la ïoh ban thep suk ïa ka kol.
Haba phai pat sha ka liang pyrshah ka la ïakhun dohïap ban pynshai ïa katei ka kol bad ïoh shibun ki kabu hynrei kim shym la urlong tad haduh da kut jingïalehkai bad mad ïa ka nam rem.
Ha kane ka sngi ka seng ka la ïoh ruh ban pyllait paidbah ïa ka kali kit nongpang (Ambulance) na ka bynta ban ai jingshakri ïa ki paidbah ka dong ka thaiñ ha ka pang ka shitom ha kaba u samla Biangbor Paliar , Vice – President KSU Sengkmie u ïoh ban pyllait paidbah ha ryngkat ka jingdon da u Bah H.S Diengdoh, SDO barim ka Ranikor Civil Sub Division, samla For-wardman Nongrem, Presi-dent KSU SWKHD , Bah Polin Lyngdoh, Secretary Shnong Mawlangwir , Samla Rutherford Lyng-doh, President KSU Maw-kyrwat Circle , samla Plos -bor Kharjahrin, Secre-tary, ki dkhot ka KSU SWKHD, Mawkyrwat Circle bad kiwei kiwei ki riew rangbah.
