New Delhi, Naiwieng:
Ki heh nongïalam jong ka seng Congress, u Rahul Gandhi bad ka Sonia Gandhi, ki la shah kynnoh ba ki donkti ha ka kam beaiñ lyngba ki jingïasuhbuit sniew jong ki ha ka jingjia jong ka jingkamai bymhok lyngba ka National Herald.
Kane ka jingshah kynnoh, ka dei shi bynta jong ka jingujor ejahar kaba thymmai, kaba la ujor pyrshah ïa ki 6 ngut ki briew, ba kynthup ïa ki Gandhi, da ka Economic Offences Wing jong ki pulit jong ka nongbah Delhi.
Ha kane ka ejahar, la kdew ruh ïa ki kyrteng jong u Sam Pitroda, u Suman Dubey, u Sunil Bhandari bad uwei u riew shimet bym lah ban tip kyrteng, ha ryngkat ki lai tylli ki kompeni – ka Associated Journals Limited (AJL), ka Young Indian, bad ka Dotex Merchandise Private Limited. Ka la kynnoh ba ka don ka jingthmu leh kam sniew ban “shim kabu bad leh thok ïa ka Associated Journals Limited (AJL)”, ka kompeni kmie jong ka kot khubor National Herald kaba la jah rngai mynta.
Ka Dotex Merchandise, kaba la kynnoh ba ka dei ka kompeni kyrshan kaba don ha Kolkata, ka la ai pisa T.1klur sha ka Young Indian, ka kompeni bym ïoh jingmyntoi sha lade ha kaba kitei ki arngut ki nongïalam ka Congress, ki bat ïa ka bhah kaba 76 percent.
La kynnoh ba lyngba katei ka jingkhaïi, ka Young Indian, ka la siew T.50 lak sha ka Congress bad ka la ïoh ban synshar ïa ka AJL, kaba don ïa ki jingdon jingem, kiba shongdor kumba 2,000 klur tyngka.
Kane ka ejahar, kaba la buh jingthoh ha ka 3 tarik, Risaw, ka dei halor ka jingujor jong ka tnad Enforcement Directorate (ED), kaba la ïasam ïa ka kaiphod jingtohkit jong ka bad ki pulit jong ka nongbah Delhi.
Hapoh ka kyndon 66(2) jong ka Prevention of Money Laundering Act (PMLA), ka kynhun ED ka lah ban pan na kano kano ka tnad ban mudui bad tohkit ïa ka kam runar ba la buh por. Ka ejahar ka la mih shisngi hadien ba ka ïingbishar jong ka Delhi ka la pynjlan ïa ka jingpynbna ïa ka rai jong ka ha ka mukotduma jong ka National Herald sha ka 16 tarik u Nohprah.
Ka National Herald Case ka sdang naduh u snem 2012 ha kaba u nongïalam ka BJP u Subramanian Swamy u la mudui ïa ka mukotduma ha ka ïingbishar jong ka thaiñ, da kaba kynnoh ba ki nongïalam ka Congress ki donkti ha ka kam thok bad pynkheiñ ïa ka jingshaniah ha ka jingshimti ïa ka Associated Journals Limited, kaba la pynmih ïa ka National Herald, ka kotkhubor kaba la lap da u Jagharla kiwei pat ha u 1938.
Ka National Herald ka la duh noh ha u snem 2008 namar ka jingduna pisa. Ha katei ka por, ka kompeni kmie ka don ka ram kaba khlem siew kaba T.90 klur. Khnang ban ïarap ïa ka AJL ban ïaleh pyrshah ïa ka jingeh, ka seng Congress ka la ai ram haduh 90 klur tyngka ïa ka ha ka por kaba 10 snem ha ki bynta kumba 100 tylli.
Hynrei, katkum ka jingong jong ka Congress, ka National Herald ne ka AJL kim shym la lah ban siew ïa katei ka ram, kumta, la pynkylla ïa ka sha ki bynta jong ka jingtreikam hok.
Namar ba ka seng kam lah ban long trai ïa ki jingïasam kiba biang, la aiti ïa ki sha ka Young Indian, ka kompeni bym ïoh jingmyntoi kaba la seng ha u snem 2010, la ong ka Congress.
Ki Gandhi ki don 38 percent ki bhah marwei marwei ha katei ka kompeni bad ïa ki bhah kiba dang sah la bat da u Motilal Vora, u Oscar Fernandes, u Sam Pitroda bad u Suman Dubey. Bad dei kumta ba ka Young Indian ka la kylla long ka nongbat bhah kaba heh ha ka AJL, ha kaba arngut ki Gandhi ki long ki nongpynïaid jong ka.
