Shillong, Naiwieng 30
Ka kynhun ïalehkai ka Jylla ka la pynliem noh ïa ka Arunachal Pradesh da 6 wiket ha ka lympung ïalehkai Syed Mushtaq Ali Trophy 2025-26 (plate group) ha ka sngi U Blei ha Pune.
Ha kane ka jingïakhun ka Arunachal ka la lah ban kamai 118 run bad shah pynkhyllem 7 wiket ha ki 20 over hadien ba kane ka kynhun ka la jop ïa ka kynting pisa bad kam trai na ka bynta ban tied nyngkong. Hynrei ka Meghalaya kaba la wan shimti ïa ka pali kaba ar, ka la lah ban kynjoh sha ka thong bad shah pynhap 4 wiket bad ka dangsah sa 5 over.
U rangïalehkai ba kynsai ka Jylla u Kishan Lyngdoh (Player of the Match) u la long u nongtied uba hakhmat eh jong ka Meghalaya ha kaba u la lah ban tied ïa ka shiteng spah kaba 57 na ki 42 bol bad khlem shah pynkhyllem haduh kaba kut. Une u nongtied ba kynsai u la khywit hynriew tylli ki ‘four’ lem bad ar tylli ki ‘six’. Te kumta u Kishan u la ïoh ban ïatied lang ryngkat u Arpit Bhatewara, uba la kamai 41 run na ki 28 bol (8x4s). Kine baroh ar ngut ha ka jingïatied lang ki lal ah ban kynjoh sha ki 62 run hashwa ban shah pynkhyllem ka wiket kaba nyngkong.
Kham hashwa, dei tang u Techi Neri uba la lah ban ïalehkai bha ha ka pali tied na ka bynta ka Arunachal ha kaba u la kamai 32 run na ki 42 bol. Kiwei pat ki nongtied ki la pyrshang, hynrei kim shym la lah ban shan hakhmat ki nongkawang bol ka Meghalaya, ha kaba ki la lah ban pynkhyllem bad ki ar ngut kiba la ïatied lang kiba la kamai bun ki la ïoh tang 36 run na ka bynta ka wiket kaba lai.
U Swarajeet Das u la long u nongkawang bol uba kynsai ka Meghalaya ha kaba u la ïoh ban khur 2/19 ha ki 3 over, katba u Agreas Chamcham Sangma u la ïoh 2/24 ha ki 4 over, katba ïa kiwei pat la ïoh da u Aaron Nongrum (1/15 ha ki 4 over) bad u Akash Choudhary (1/21 ha ki 4 over).
Kumba ka long mynta ka Meghalaya ka la wan ba-ar ha kane ka jingïalehkai jong ka ‘plate group’ ha kaba ka la kamai 8 point lyngba ki ar tylli ki jingjop, kawei ka dei ha ki saw sngi ba la lah pyrshah ïa ka Sikkim. Hapdeng kane ka jingïakhun ka la shah rem da 25 run ha ka Manipur, kaba danglamkhmat ha kane ka lympung, myn ha ka sngi Thohdieng.
Te kumta ka Meghalaya kan pynkhreh biang ïa ka jingïakhun ka ban wan pyrshah ïa ka Nagaland ha ka sngi Ba-ar.
