Shillong, Nohprah 01
Ka Jylla Meghalaya ka la rakhe ïa ka World Aids Day 2025 ha ka 01 tarik u Nohprah, 2025 da kaba wanrah ïa ka rukom treikam kaba la tip kum ka ‘Mission Mode Plan’ ba la mang tyngka 25 klur na ka bynta san snem ban kyntiew ïa ka jingtest HIV, ka jingsumar bad ban ïalap sha ki shnong bapher-bapher ka Jylla.
Ïa kane la pyntip da u Bah Wailadmiki Shylla, Myntri ba dei khmih ïa ka tnad ka koit ka khiah ka Sorkar Jylla ha ka jingïalang ha State Convention Centre uba la ong ba kane ka sienjam ka buh ïa ka Jylla napdeng khyndiat kiwei pat ban bei tyngka ban pynkylla ha ka jingïakhun pyrshah ïa u khñiang HIV.
Ha kane ka sienjam, ka Sorkar Meghalaya kan pynkhlaiñ ïa ki Centre ban test bad sumar, ka jingïatreilang da baroh kiba ïa don bynta, ka jingïalap ban weng ïa ka jingpeit ibeiñ ïa kiba im bad u khñiang HIV, nalor kiwei-kiwei pat.
U la ai ka jingïaroh ïa ka Meghalaya AIDS Control Society ha ka jingïalam ka Dr. KL Iawbor, Project Director halor ki sienjam ba kum ka Society ka shim ban ïakhun pyrshah ïa ka jingpang AIDS.
Na ka liang u Sampath Kumar, Principal Secretary ka tnad u la pyntip ba ki don haduh mynta palat 9000 ngut ki briew kiba im bad u khñiang HIV bad man u snem la shem ba palat 900 ngut ki ngat ha une u khñiang lyngba ki jingtest. U la ong ba ka East Khasi Hills, West Jaiñtia Hills bad East Jaiñtia Hills ki dei ki District kiba wan sha khmat ha ka jingbun kiba im bad u khñiang HIV bad bynrap ba ka jingïalap ka dang poi tang hapdeng 16 bad 17%.
Ha kane ka sngi, u Paul Hrangbung, President jong ka Meghalaya State Network of Positive People (MSNP), bad advocate Agui Deimei ki la batai halor ki jinglap shimet bad jingim bad u khñiang HIV bad kyntu ba ka long donkam ban pdiang, ban long kyrpang bad ym dei ban don jingibeiñ ïano-ïano ha ki longïing ne ki shnong ki thaw.
Ki MLA ba kynthup ïa u Bah Ollan Sing Suin, Bah Adelbert Nongrum bad u Bah Matthew Beyondstar Kurbah, ki la ïasnoh kti bad ki ophisar ka tnad ba kynthup ïa u Dr. JS Momin, Dr. Neela E. Kharsahnoh, Dr. Lumrilyne Mylliemumlong bad Dr. Rezina Ch. Marak, ban ïa ai ka jingkyrshan halor kane ka jingthmu.
