Shillong, Nohprah 01
U Chesterpaul Lyngdoh u la ïoh ban khyrwit da ka hat-trick na ka bynta ban pynlong ïa ka Nongkseh ba kan pynjem khnap haduh 7-0 kol ïa ka Mawlynrei ha ka jingïakhun ka Group-B jong ka SSA Champions Cup 2025, ha ka lah sngi U Blei.
Katba ha ka jingïakhun jong ka Group-A pat ka Umlyngka ka la jop da 1-0 kol ïa ka Mylliem Lum, ha kaba ïa kane ka shi kol la thep da u Samborwell Nongbsap ha ka minit kaba 67.
Haba phai sha ki 7 tylli ki kol kiba ka Nongkseh ka la ïoh ban thep ki la wan urlong lyngba ki lai kol ba la ïoh da u Chesterpaul ha ka minit kaba 40, 45+3 & 58, ïa kaba la bynrap lang ar kol da u Kitboklang Pale (51 & 53), kumjuh u Hardy Cliff Nongbri (63) bad Gerrard Dakerlang Sun (84), kaba pynlong ïa ka Nongkseh ban khur ïa ka jingjop.
Haba phai sha ka kynhun ïalehkai ka Umlyngka watla ka la lah ban khur ïa ki lai point, hynrei ka thong ban jam kham shakhmat kam lah ban urlong hadien ba ka la mad arsien ki jingshah rem ha ka Group-A.
Haba phai sha ka Group-B, ka jingjop ka la pynlong ïa ka Nongkseh ba kan ïai neh ha ka kyrdan kaba ar, katba ka jingshah rem ka Mawlynrei ka la pynlong ba kan hiar sha ka kyrdan kaba saw.
Ka jingïakhun ha ka sngi Ba-ar kan long hapdeng ka Laitkyrhong pyrshah ïa ka Shillong Lajong ha ka Group-B ka ban long ha ka por 1 baje mynsngi, ha kaba yn bud sa ka jingïakhun jong ka Group-A hapdeng ka Langsning FC pyrshah ïa ka MLP F.T ha ka por 4:30 janmiet.
