Washington, Nohprah:
U Pope Leo ha ka Sngi U Blei, u la ong ba ka rai kaba biang tam ban pynkut noh ia ka jingiakynad hapdeng ka Israel bad ka hamas, ka long ban ithuh noh ia ka Palestine kum ka ri lane ka jylla.
Namar u la ong ba baroh ki tip shai ba ha kane ka kynti, ka Israel kam shym la treh ban pdiang ia kane ka rai, hynrei la iohi shai ba dei tang lyngba jong kane ka lad ba kan lah ban wanrah ia ka shongsuk- shongsaiñ ia baroh arliang ka Palestine lane ka Israel ha kine ki por ki snem ki ban wan.
“Ngi long ruh ki paralok jong ka Israel bad ngi wad lad ban long ka sur nongpynïasuk hapdeng kitei ki arliang mamla, kaba lah ban ïarap ïa ki ban tehlakam ïa ki jingbym-iabeit kaba don ka hok na ka bynta jongki baroh arliang,” la bynrap shuh shuh u Pope, haba kren ha ka ktien Italy.
U Myntri Rangbahduh ka Israel, u Benjamin Netanyahu, u la pynpaw biang ia ka jingpyrshah ia ka jylla Palestine, hadien ba wat ka paralok kaba heh duh jongka – ka US, ka pyni ia ka jingkyrshan ia ka jinglaitluid jong ka Palestine.
U Leo u la kren ha ka jingïalang lyngkot jong ki nongthoh khubor kaba 8 minit kaba la pynleit jingmut ha ka jingleit jngoh jong u sha Turkey, kaba u la leit jngoh naduh ka Sngi Palei haduh ka sngi U Blei ha ka jingleit jngoh jong u shabar ri kaba nyngkong, naduh ba la jied ïa u ha u bnai Jymmang kum u nongïalam jong ka Balang Katholik kaba don palat 1.4 Billion ngut ki dkhot riewngeit.
U Pope u la ong ba ma u bad u President ka Turkey- u Tayyip Erdogan, ki la ïakren halor baroh ar ki jingïakynad hapdeng ka Israel bad ka Palestine bad ka Ukraine bad ka Russia. Ha kaba, u la ong ba ka Turkey, ka don ka bynta kaba kongsan ba kan lah ban iarap pynkut noh ia baroh ar tylli kitei ki thma kiba la neh mynta da ki snem.
Hynrei ka donkam pat ia kitei ki ri baroh ba kin iatreilang bad kin ia mynjur lang halor kiei- kiei kiba ki nongialam ka pyrthei ki la ialam lynti sha ka jingiasuk.
