Nongstoiñ, Nohprah 01
Ha ka sngi Nyngkong jong ka taïew ki paidbah nongshong shnong jong ki 5 tylli ki shnong kiba don ha ka thaiñ Mawtynrong kaba jngai tang kumba 6 Km eiei na ka Block Riangdo ha Mawshynrut Civil Sub Division ki la pynkup burom ïa u Bah Methodius Dkhar, MLA ka Mawshynrut ha kajuh ka por kum u Myntri Sorkar, ïa kaba la pynlong hapoh ka shnong Lumdiengsong.
La ïathuh ba katei ka thaiñ baroh shi katta ki la mad ïa ki jingsohsat namar ka jingbym don ïa ka surok kaba bha bad ka surok ka long kaba dang khohruh khohram, hynrei mynta ka kynti ki paidbah nongshong shnong jong kitei ki 5 tylli ki shnong kiba hap ruh hapoh ka Polling Station jong ka Mawtynrong kiba kynthup ïa ka shnong Lumdiengsong, Mawtynrong, Tynrongriangkhon, Mawshut bad Mawkham Mawmlieh kila dap da ka jingkmen bad jingphuhmut phuhmat hadien ba ka Sorkar kala mang pisa ban shna ïa katei ka surok ha kaba ka jingtrei ruh kala sdang ban ïaid shakhmat.
Ki riew rangbah jong ki 5 tylli ki shnong kila pynpaw ruh da kaba ong ba kane ka jingurlong bad wan poi ka surok kaba bha ha katei ka thaiñ ka dei lyngba ka jingtrei shitom u MLA ka thaiñ u Bah Methodius Dkhar uba la long mynta kum u Myntri Sorkar ha kaba ym tang ka surok shen katei ka thaiñ kan sa ïoh ruh sa ïa ka Sub Centre nalor kiwei-kiwei.
Kumta dei halor kane ka nongrim kum ka dak ban sngewnguh ïa u MLA na ka liang jong kitei ki 5 shnong kiba hap ha ka Polling Station Mawtynrong kila pynkup burom ïa u Bah Methodius Dkhar kum u MLA bad kum u Myntri Sorkar.
U Bah Methodius haba ai jingkren ha katei ka jingïalang u la ong ba ïa katei ka surok la lah ban ïoh naduh ka por ba um pat long Myntri Sorkar bad u la ong ruh ba dei ma u nyngkong uba kmen hadien ba la ïoh jingtip bala mang pisa ïa ka surok na Block Riangdo sha Mawtynrong namar u ju kynmaw ïa ki jingkren ki riew rangbah ba tang 6 Km na Block Riangdo hynrei ka surok ka long kaba sniew tasam.
Shuh shuh u la ong ruh ba ka jingleit pynïasoh jong u sha ka Sorkar kam dei na kano-kano ka daw hynrei na ka bynta ban lah ban ïaksaid na ka bynta ban wanrah ki kam pynroi hapoh ka thaiñ Mawshynrut hi baroh kawei kumta u la kyntu ïa ki paidbah ban ai ka jingïatreilang na ka bynta ka bha ka miat jong ka thaiñ Mawshynrut hi baroh kawei.
