Shillong, Nohprah 01
U President ka Meghalaya Pradesh Congress Committee u Bah Vincent H Pala u la kynnoh ba ka jingseng ïa ka ‘Regional Front’ ka kynhun ba thymmai ha North East ba la ïalam da ka National People’s Party bad ka TIPRA Motha, ka dei ka buit jong ka Bharatya Janata Party (BJP) ban pynpait pynpra ïa ki kynhun kiba pyrshah BJP ha ka thaiñ.
Haba kren sha ki nongthoh khubor ha ka sngi Nyngkong u Bah Vincent H Pala u la ong, ka jingseng ïa ka ‘Regional Front’ ha ka thaiñ North East ka dei ka buit poh jong ka Rashtriya Swayamsevak Sangh (RSS) bad ka BJP namar ba ki ïohi ba ki briew jong ka thaiñ Shatei Lam-Mihngi ki don kiba ym pat pdiang ïa ka BJP, hynrei ban ïoh pat ïa kum kita, ki thaw noh da kawei ka kynhun sengsaiñ pyrthei khnang ba kin wan ban ai jingkyrshan ïa ka seng jong ki.
“Kane kadei ka buit jong ka RSS bad ka BJP ba ki kwah ban pynmih sa kawei ka seng ban pyn-ngat ïa kiba pyrshah BJP, khnang ba kin nym leit sha ka Congress lane kiwei ki party” ong u Bah Pala.
U Bah Pala u la ong ba ki kynhun ïatreilang kiba don ha ka ‘Regional Front’ ruh lada bishar bha ki dei hi ki paralok jong ka BJP bad kane ka dei beit-beit ka jingthmu jong ka BJP bad tang ynda ki la jop ha ka ilekshon ki leit ïatreilang beit bad ka BJP.
Halor kane u la kyntu ïa ki paidbah jong ka thaiñ Shatei Lam-Mihngi ba kin long kiba husiar da kaba pynpaw ba ka ‘Regional Front’ bad ka Bharatiya Janata Party kim don jingïapher eiei ki jingthmu jong ki.
