Shillong, Nohprah 01
U President ka Meghalaya Pradesh Congress Committee (MPCC) Bah Vincent H Pala, u pdiang sngewbha ïa kiba bun ki nongïalam kiba la mih na ka party bad kiba kwah ban wan pynïasoh biang bad ong ba ka jingwanphai jong ki, ka dei ka dak ba ka Congress ka sdang ban khie-im biang ha Ri-lum Garo.
“Kiba bun ki briew kiba ju don ha ka Congress bad kiba la mih noh, mynta ki la sngewthuh ba dei tang ka Congress kaba ïakhun na ka bynta ki rit paid bad ki riewlum bad dei na kata ka daw ba ki la wanphai biang” ong u Bah Pala.
U Bah Pala u shim ba ka jingphet seng ha shuwa ka ilekshon ka la kylla bad pynpaw ïa ka jingsngewskhem ba ka Congress kan lah ban lehbha ha ka ilekshon Garo Hills Autonomous District Council ban sa long.
U la ong ba ka Cong-ress ka la ïoh pdiang haduh 67 ngut ki nongpan tiket ban ïakhun na ka party hynrei ka party kan sa pynkhreh bha ban ïakhun ïa ka ilekshon ka GHADC bad haduh ba ka Sorkar kan pynbna ïa ka tarik ban long ilekshon ka party kan sa jied ïa ki kyrteng jong ki ban ïoh tiket.
U Bah Pala ula ban jur ba ka jingjop ïa ka ilekshon ka shong ha kiba bun bynta, ba kynthup ka liang pyrshah bad kiwei ki party. U la pynpaw ruh ba ka Congress ka don ïa ki kyrtong kiba biang. Haba jubab ïa ki jingkylli, u Bah Pala u la pynpaw ba haduh mynta ym pat don ka jingïakren bad kino-kino ki Myntri Sorkar, kiba la shah weng dang shen na ka kynhun Myntri ba ïalam u Conrad K Sangma, hynrei u la ban jur ba ka jingkhlaiñ bad ka jinglah ban lehbha ka party ha Ri-lum Garo kan dei kaba kongsan bha ha ka ban khring pat ïa kiba la phet seng.
Haba bynrap, u la ong ba ka dang kloi palat ban ong ba katno ngut ka party kan ïoh jingjop ha ka ilekshon GHADC, hynrei u la kam ba ka party ka la pynkhreh bha na ka bynta ban ïakhun ïa ilekshon GHADC.
