Shillong, Nohprah 01
U Myntri Rangbah ka Jylla Conrad K Sangma u la ong ba 80% na ki nongshong shnong ka Jylla ki dei kiba hap hapoh ka jingkhmih ki briew kiba trei hapoh ka tnad C&RD.
“Namar kata, phi don ïa ka jingkitkhlieh kaba khraw bha bad nga kyntu ïa phi ban ïai bteng ha ka ban trei da ka jingkut jingmut bad jingaiti lut ha ka kam,” ong u Conrad ha ka jingplie ïa ka ophis Building jong ka Directorate of Community & Rural Development (C&RD) ha Lower Lachumiere, Shillong.
Ha kane ka jingïalang kiba la ïadonlang ki kynthup ïa u Myntri ka tnad C&RD Bah Sosthenes Sohtun, u Chief Secretary ka Jylla Dr Shakil P Ahammed, Principal Secretary ka tnad C&RD Sampath Kumar bad Director ka C&RD SC Sadhu.
U Myntri Rangbah haba ai jingkren u la ong, ka tnad C&RD ka don ïa ka bynta kaba kongsan bha ha ka jingkyntiew ïa ka ïoh ka kot bad ka rukom im jong ki nongshong shnong ha ki jaka nongkyndong.
“Ka tnad C&RD kala treikam bha da ka jingkut jingmut bad jingaiti lut ha ka ban pynpoi ïa ki skhim, ki projek bad ki kam bha lang sha ki shnong nongkyndong, kaba wanrah ïa ka jingkylla ha ka jingim jong ki briew ha ki shnong ki thaw,” u la ong.
Haba ai khublei ïa ka tnad ïa ka jingïoh ïa ka ophis building, u Myntri Rangbah u la ong ba watla ki jingtei/ophis ka long kaba kongsan ban lah treikam bad shakri bha, “Ka dei u klongsnam bad ka mynsiem kaba ka jingtrei jong phi ka wanrah ïa ka jingpher”.
