Shillong, Nohprah 01
Ka Arsenal kaba bat ïa ka kyrdan ba hakhlieh ha ka Premier League ka la ïasam mar shi point ha Stamford Bridge ha ka miet jong ka sngi U Blei pyrshah ïa ka Chelsea, ha kaba ki la ïakhaid mar 1-1 kol.
Wat hapdeng ka jingïalehkai tang 10 ngut ki rangïalehkai hadien ba u Moises Caicedo u la ïohpdiang da ka red card ha ka kylla step, ka Chelsea ka la ïoh ban pynkhih jar nyngkong lyngba u Trevoh Chalobah ha ka minit kaba 48. Hynrei u Mikel Merino u la lah ban pynïakhaid kylla na ka bynta ka Arsenal ha ka minit kaba 59.
U Mikel Arteta, u coach jong ka Arsenal, uba la duh noh ïa u Gabriel bad u William Saliba, u la pynpaw ba ka jingpyrshang jong ka kynhun jong u ban khie im biang na ka jingbym lah ban thep kol ha kaba sdang, kynthup ïa ka jingjop ïa ka Bayern Munich, ka long kaba sngewtynnad.
“Ngi la duh ïa ki nongïalehkai ha kito ki jingïalehkai. Mynta ka sngi ngi la hap ban ïalehkai ïa ka jingïatreilang kaba ngim pat ju ïalehkai mynno myn-no ruh ha ka jingïalehkai kaba eh shisha,” la bynrap biang u coach.
“Ka la long ka jingïakhun kaba eh bha na ka bynta jong ngi. Hynrei nga don ïa kane ka jingsngew ba mynta ka sngi ngi la dei ban jop ïa ka jingïalehkai, bad ngim shym la jop,” la batai une u coach uba na Spain.
Lyngba kane ka jingïakhaid, ka Arsenal ka la tam da 5 poiñ ïa ka Manchester City kaba la wan ba-ar bad ïa ka Chelsea kaba la wan balai. Ka Aston Villa, kaba la jop da 1-0 kol ïa ka Wolves ka la wan ha ka kyrdan basaw bad 24 poiñ bad ka Brighton ha ka kyrdan basan.
Ka Sunderlad kaba dangshu kiew kyrdan ha kane ka lympung, ka la don ha ka kyrdan ba hynriew ha kaba ka la ïaryngkat bad ka Brighton, hynrei ka la tam ha ka jingthep kol. Ka Manchester United ka la don ha ka kyrdan ba hynriew bad 21 poiñ hadien ba ka la jop ha Selhurst Park pyrshah ïa ka Crystal Palace.
