Shillong, Nohprah 01
Ka District Magistrate jong ka East Khasi Hills District ka la pynmih ïa ka hukum hapoh ka kyndon 163 BNSS, kaba khang pyrshah ïa ka jingïaid jong ki kali kit skum kiba kit palat pud ha kylleng ki bynta jong ka nongbah Shillong.
Ka jingmih kane ka hukum ka long kaba donkam hadien ka jingïoh ïa ka jingtip ba ka jingdon jong ki kali kit skum kiba kit palat pud bad ïaid ha ki surok, ki buh ha ka jingma kaba khraw bad ba ki lah ban ïatyngkhuh bad ki waiar bording kaba lah ban wanrah ïa ka jingjia kem ding.
Shuh shuh la ong ba nalor kane, kine ki kali kit skum kiba kit palat pud ki pynhap ruh ïa u skum ha ki lynti bad surok shnong, kaba wanrah ïa ka jingpynwit ïa ka khuid ka suba.
Kumta kino-kino kiba leh pyrshah ïa kane ka hukum, kin shah pynshitom katkum ki kyndon jong ka 223 jong ka BNS. Kane ka hukum kan treikam mardor bad kan neh tad ynda la pynbna da kumwei pat.
