Florida, Nohprah:
Ki heh ophisar jong ka sorkar Trump ki dang ïakynduh ïa ki nongïakren jong ka Ukraine ha Florida ha ki khyndiat sngi ba la leit, da kaba pynbor ban pynkut noh ïa ka thma jong ka Russia ha Ukraine bad buh ïa ka lynti naka bynta ki jingïakren ba kongsan kiba la thmu mynta ka taiew ha Russia bad u Vladimir Putin, uba long u nongïalam ka Russia.
La khmih lynti ba u Symbud Myntri ki kam bar ri ka US, u Marco Rubio, u nonglam khubor ba kyrpang, u Steve Witkoff bad u Jared Kushner, u khun ksiew jong u President ka US- u Donald Trump, la khmih lynti ba kin shong bad ka kynhun jong ka Ukraine ban pynjanai shuh shuh ïa ki jingtip ba bniah halor ka jingthmu ban ïasuk, ki jingïakren kiba wan ha ka por kaba khia bha na ka bynta ka Ukraine katba ka dang ïai bteng ban pynkhih pyrshah ïa ka Russia2.
Ha ka sngi Sngi Thohdieng, tang hashwa jong ka por iashong pyrkhat kam ba la ban long hapoh Florida, u President ka Ukraine, u Volodymyr Zelenskyy, u la pynbna ïa ka jingiehnoh kam jong u heh shipai ba donbor jong u, u Andrii Yermak, uba haduh katei ka por u la long u nongïakren ba hakhmat eh jong ka ri, ha ki jingïakren kam bad ka US.
Kane ka jingpynbna ka long hadien ba la talasi ïa ka ïing jong u Yermak da ki nongtohkit pyrshah bamsap. Ka sorkar jong u Zelenskyy ka la shah pynkhihwin namar ka jingkynnoh kaba palat $100 million kaba u la bamsap na ka pla tyngka jong ka tnat bor-ding lyngba ki jingsiew ba la siew da ki kontraktor, kaba la wanrah ïa ki jingeh kiba thymmai hapoh ka ri na ka bynta ka sorkar jong u Zelenskyy.
Dei tang shi taiew mynshwa ba u Rubio u la ïakynduh ïa u Yermak ha Geneva, ha kaba kawei pa kawei ka liang ka la ong ba ka jingïakren ka la long kaba bha ha kaba buh lang ïa ka jingthmu iakren ïasuk ba la pynkylla thymmai bad buh jingthoh thymmai da ka US.
Mynta, katei ka kynhun jong ka Ukraine, ka kynthup ïa u Andrii Hnatov, uba dei u heh jong ki shipai jong ka Ukraine; U Andrii Sybiha, myntri kam bar ri jong ka Ukraine; bad u Rustem Umerov, uba dei u khlieh duh jong ka kynhun iada ri jong ka Ukraine, u Zelenskyy u la ong.
Ki nongmihkhmat ki la pynleit jingmut ha ki jingpynkylla thymmai ïa ka plan ba tyrwa jong u Trump kaba don 28 tylli ki mat ba la thaw ha ka jingïakren hapdeng ka Washington bad ka Moscow. Ia kata ka jingthmu la kynthoh ba ka long kaba khia palat ia ki jingdawa jong ka Russia. Ha kaba sdang ka la mutdur ba ka Ukraine kan aiti ïa ka thaiñ mihngi jong ka Donbas baroh kawei sha ka Russia – ka jaka sahkut jong ka Kyiv.
Ka jingthmu – kaba u Trump naduh katei ka por u la pynrit kum ka “jingmut” lane ka “map” ban “pynbeit bha” – kan buh ruh ïa ki kyndon halor ka jingheh jong ki shipai jong ka Ukraine, kan khanglad ïa katei ka ri ban rung sha ka NATO, bad kan dawa ïa ka Ukraine ban pynlong ïa ka elekshon hadien 100 sngi. Ki nongiakren ki la pyni ba ka rukom treikam ka la kylla, hynrei ym pat shai kumno la pynkylla ia ki kyndon jong ka.
U Trump, u la ong ha ka sngi thohdieng ba un sa phah ia u Witkoff bad lehse ia u Kushner sha Moscow mynta ka taiew ban ia kynduh ia u Putin halor katei ka jingthmu. Baroh arngut u Witkoff bad u Kushner, kum u Trump, ki wan na ka pyrthei jong ka kam die jaka kaba kheiñ kor ïa ka jingïateh kular ban ïa ki jingïateh kular jong ka jingïadei. Kine ki arngut ki don ruh shadien jong ka jingtyrwa kaba 20 tylli ki mat kaba la pynlong ïa ka jingsangeh thma ha Gaza.
U Zelenskyy u la thoh ha ka X ba ka kynhun jong ka Ukraine kan “trei stet bad thikna ia ki sienjam kiba donkam ban pynkut noh ia ka thma.”
Ha ka jingkren jong u mynmiet ha ka sngi saitjaiñ, u Zelenskyy u la ong ba ka liang jong ka America ka “pyni ïa ka rukom treikam kaba tei.”
