Shillong, Nohprah 01
Ka kynhun ïalehkai ka India ka la wan na dien ban pynliem ïa ka IR Iran da 2-1 kol ha ka jingïakhun ba khatduh jong ka ha ka Group-D ha EKA Arena kaba ha Ahmedabad, bad ka la pynskhem ïa ka jingïoh rung sha ka AFC U-17 Asian Cup Saudi Arabia 2026.
Kane ka long ka sien kaba shiphew ba kane ka kynhun ka la lah ban pynurlong ban ïoh rung sha kane ka lympung.
Ha kane ka jingïakhun ka Iran, kaba la kamai 7 poiñ hadien ba ka la long ka kynhun kaba khlem pat shah rem, ka la donkam ban shu pynïakhaid ïa ka India, kaba la kamai 4 point bad kaba la donkam ban khur ïa ka jingjop.
Hapdeng kane ka jingïakhun ka Iran ka la ïoh ban pynkhih jar nyngkong eh lyngba u Amirreza Valipoor ha ka minit kaba 19. Kane ka shi kol ka la pynïoh mynsiem ïa kane ka kynhun ba kan kynjoh sha ka thong jong ka jingjop. Hynrei hashwa ban kut ka kylla step, ka India ka la lah ban pynphai kylla lyngba u Dallalmuon Gangte hadien ba u la ïoh da ka penalty ha ka minit kaba 45+1 na ka bynta ban ïakhaid mar shi kol.
Hadien katto katne por ba la bteng ïa ka jingïakhun jong ka kylla miet, ka India ka la thep biang sa shi kol lyngba u Gunleiba Wangkheir akpam ha ka minit kaba 52. Haduh kaba kut kut ka Iran kam shym la lah ban pynphai bad ka la mad ïa ka jingshah rem.
Lyngba kane ka jingjop, ka India ka la kamai 7 poiñ na ka bynta ban ïaryngkat bad ka Iran, hynrei ka la tam lyngba ka jingïapher ha ka jingthep kol, kaba ka biang pura ban ïoh rung sha ka Asian Cup ka ban long ha Saudi Arabia ha u snem 2026.
