Dhaka, Nohprah:
Ha ka jingpyniaid shakhmat ia ki mukotduma bamsap pyrshah ïa ka Sheikh Hasina bad kiba haïing jongka, ki jingeh kiba kham jur ki la mih na ka bynta kane ka Myntri Rangbahduh barim jong ka Bangladesh, ka para jong ka bad ka khun ksiew jongka, ka dkhot jong ka Ïingdorbar jong ka ri Bilat, ka Tulip Siddiq.
Ka ïingbishar jong ka Ri Bangladesh, ka la rai pynrem ïa ka Myntri Rangbahduh jong ka ri, ka Sheikh Hasina, ka para jong ka, ka Sheikh Rehana, bad ïa ka khun ksiew jong ka, kaba dei ruh ka MP jong ka ri Bilat, ka Tulip Siddiq, ha ka mukotduma, kaba la kynnoh, ba ka dei kaba ïadei bad ka jing ai jaka hapoh ka Purbachal New Town Project ha Dhaka.
Ka Sheikh Hasina, ka la shah rai set patok 5 snem, katba ka para jongka, ka Sheikh Rehana- kaba la don ryngkat bad ka, ha ka por jong ki jingiakhih ba shyrkhei ha u snem ba la dep, ka la shah rai set patok haduh hynñiew snem kynthih, da ka Anti-Corruption Commission (ACC).
Ka ïingkashari jong ka Dhaka, ka la rai ruh ia u MP jong ka Britain, u Tulip Siddiq, da kaba set phatok ar snem. Ka Siddiq, ka la kynthoh kham mynshwa ïa ka rukom treikam jong ka aiñ ha Bangladesh, da kaba ong ba ka dei ka “jingpyrkhat saiñ hima sima” bad ka la batai ïalade kum ka “jingpynjot ba la pynsniew” ha ka jingïakhun saiñ hima sima ha katei ka ri. Ka la long Myntri haduh ka jingiehnoh kam jongka ha u bnai Kyllalyngkot ba la leit thombor da ki paidbah ia ka ophis treikam bad kaba jaka sah jongka namar ki kam bamsap kiba la paw pyrthei bad kiba la kynnoh pyrshah ia ka ha katei ka por.
Ka Awami League ka la kynthoh ia ka rukom treikam aiñ, da kaba khot ia ka “kaba lah ban tip lypa.” Ka seng ka la ong, “Kumba long kiwei pat ki mukotduma ACC kiba dang shen – namar ba ka paw shai ba ka ACC hi ka dei ka lad sain pyrthei kaba la pyndonkam na ka bynta ki jingthmu saiñ pyrthei da ki briew kiba la duh jingkyrmen, ki bym shah jied.”
“Ki jingkynnoh pyrshah ïa ka Sheikh Hasina, ka para jong ka, bad kiba bun kiwei pat, kynthup ïa ki dkhot jong ka longïing kaba jan bad kaba kham heh jong ka, la kyntait tyngeh. Ym shym la ïohsngew ïa kino kino ki sakhi kiba pynsngewthuh ïa ka jingbamsap ha ka ACC, namar ba ym don satia. Ki nongshah mudui kim shym la don ïa ka jingïasaid aiñ kaba biang ha ka ACC bad la bishar ïa ki khlem don ha ka ACC,” la ong ka ACC.
Ka Anti-Corruption Commission (ACC) ka la mudui 6 tylli ki mukotduma ba kyrpang ha u bnai Kyllalyngkot halor ka kam bamsap kaba iadei bad ka jingai jaka. Lait na ka Sheikh Hasina, u khun jong ka u Sajeeb Wazed Joy bad ka khun kynthei ka Saima Wazed Putul ruh ki dei kiba shah kynnoh bad shah jer kyrteng lang hapoh jong kitei ki mukotduma.
Ha ka 17 tarik u Naiwieng, ka Sheikh Hasina, ka la shah rai pynrem bad la rai pyniap syndon ia ka, da ka International Crimes Tribunal jong ka Bangladesh, ryngkat bad u Myntri kam poh-iing barim, u Asaduzzaman Khan Kamal.
