Ki niam ha pyrthei kim nym lah ban pyllait na ka pop, kum ka niam khristan, Muslim, Buddhist, Hinduism, Jainism, Sikhism, Jewish bad kiwei kiwei. Baroh ki jait kynhun niam ki don la ka jong ka jong ka rukom ngeit bad hikai shaphang u Blei. Ka rukom hikai ka long ba ngin im hok leh hok ba ngin ioh ïa kata ka jingsuk bneng. Te ban ioh ïa ka jingsuk dei tang ka bor jong u Blei ym dei ka bor jong kano kano ka kynhun niam. Ka niam kam lah ban pyllait ïa ngi na ka pop. Namar wat la ngi don ha kano kano ka niam ruh ngim ym lait na ka jynjar ka khuslai, ka pang ka shitom bad na ka jingïap kaba long ka pop. Namar ka bainong jong ka pop ka long ka jingïap (BIble). Namar u Briew hi um lah ban ioh diang eiei ruh em, lymda la ai ha u na bneng (Ioannis 3 : 27). Ngi long tang ki briew kaba ngi ngeit ba dei u Blei uba la thaw ïa ngi ki briew na kane ka sla pyrthei. Dei na kane ka daw ngi ki briew ngi la thaw ïa ki kynhun niam bapher bapher ban pynïajan bad u Blei. U Blei hi u long uba donbor tam eh ïa baroh. Ym don kano kano ka ri kaba lah ban ïeng pyrshah ïa u Blei. U Blei u bat ïa ka jingim bad ka jingiap jongngi ki briew.
Dei tang u Blei uba tip lypa ïa ka jingïap jong ngi ki briew ha kane ka sngi ngi dei ban ïap bad ïehnoh ïa kane ka pyrthei. Ki bor shipai kiba khlaiñ katno katno ruh kim lah ban ïaleh bad u Blei. Ka kyntien Blei ka long kaba khraw tam napoh khrum ka bneng. Ka niam ka long tang ka Decoration bad tang kum ka tynghung kaba pynsawa ïa ki kam ba ngi leh kum ki briew ba shong ba sah ha kane ka sla pyrthei. Ki Syiem ne ki patsha kiba khraw bor katno katno ruh kim lah ban pynjrong ne pynlyngkot ïa la ka jingim. Namar ïa ka jingim jong ngi ki briew la bat da u Blei. Ha nga ïa ka niam ngam da sngewpher eiei la ka dei kano kano ka jait niam ruh, kaba nga thrang hapoh ka mynsiem dei tang ba ngan ïoh ka jingmap bad jingisynei ka jong u Blei. Namar dei tang u Blei uba lah ban pyllait ïa ngi na kiei kiei la ka dei ka bneng ne ha pyrthei.
C. B. Iawphniaw
