Shillong, Nohprah 02
Ka ïingbishar Meghalaya High Court kala bthah ban ïapynbeit noh da ka jingïasngewthuh jingmut lang halor ka jingtyrwa ban pynkynriah ïa ki 342 tylli ki longïing na Them Metor kaba don ha Them Ïew Mawlong.
Ka Division Bench ba kynthup ïa u Chief Justice Soumen Sen bad Justice W Diengdoh ha ka hukum ba la pynmih ha ka sngi Ba-ar, kala pynjlan ban shong bishar biang ïa kane ka mukotduma ba don bynta hapdeng ka Sorkar Meghalaya bad ka Harijan Panchayat Committee (HPC) haduh u bnai Rymphang 2026.
“Ngi khmih lynti ïa mynta ba kan don noh ka jingïapynbeit ba ïasngewthuh jingmut lang halor ki jingïakajia baroh,” ong ka hukum.
U Advocate General u la pyntip ïa ka ïingbishar ba ki jingïakren ki dang ïaid ban pynbeit ïa ki jingïakajia hapdeng ki liang mamla bad u nongïasaid aiñ ka HPC ruh u la pynthikna ba ki jingïakren ki dang ïaid.
“Lada ka jingïakren kam poi sha ka jingïabeit, ïa kane ka mukotduma lah ban shong bishar katkum ka jinglong jingman,” ka la ong.
