New Delhi, Nohprah:
Ka India ka la ai jingbit ïa ka Pakistan na ka bynta ki liengsuiñ jong ka kaba kit jingkit na ka bynta ban ai jingïarap sha ki lanot ‘erïong ha Sri Lanka ban pyndonkam ïa ka lynti suiñ jong kane ka ri.
Katkum ki tyllong khubor, la ong ba ïa ka jingkyrpad ba thikna ban her palat ïa ka liengsuiñ la aiti da ka Pakistan sha India ha ka por kumba 13:00 baje IST, da kaba pan jingbit ban her halor ka suiñ jong ka India ha ka 1 tarik u Nohprah.
Da kaba shim ba katei ka jingkyrpad ka dei kaba ïadei bad ka jingïarap ïa ka Sri Lanka, ki tyllong khubor ki la ïathuh ba ka sorkar “ka la pynbeit kloi ïa katei ka jingkyrpad.”La pyntip sha ka sorkar Pakistan ha ka por 17:30 baje lyngba ki lad ba thikna, saw kynta hadien ba la buh ïa katei ka jingkyrpad.
Ïa kane ka jingleh na India, wat la ka Pakistan ka la khang ïa ka jaka suiñ jong ka na ka bynta ki liengsuiñ jong ka India, hynrei la shim ba ka dei tang na ka bynta ka jingsngew briew, la ïathuh ki tyllong khubor.
Da kaba kyntait ïa ki khubor jong ki lad pathai khubor jong ka Pakistan kiba pyrshah, ki tyllong khubor ki la ong, “ki lad pathai khubor jong ka Pakistan, kumba ju long, ki pynleit jingmut ha ka jingpynbna bad pynsaphriang ïa ki khubor lamler. Kine ki jingkynnoh ki long ki bym don nongrim bad kiba ïalam bakla. Baroh ki jingkyrpad na ka bynta ka jingleit liengsuiñ ne ka jingïaid lynti la pyntreikam katkum ki rukom treikam ba la buh bad ki kyndon jong ka pyrthei.”
Ki rai jong ka India halor ki jingbit ban leit sha ka suiñ la synshar da ki jingpeit bniah ba thikna jong ka jingtreikam, ka jingstad, bad ka jingïada, ym da ki jingpyrkhat saiñ hima sima, la bynrap shuh shuh ki tyllong khubor.
