Senegal, Nohprah:
La iathuh ba kawei ka jhad kit umphniang diesel jong ka Russia ka la mad ïa 4 tylli ki jingbthei na ki bynta ba shabar jongka, hajan Dakar jong ka nongbah Senegal, ong u Manager jongka, ka jhad kaba lai kaba don jingïadei bad ka Russia kaba la shah pynbthei ha kine ki khyndiat sngi ba ladep.
Kumta la ong ba ka um na katei ka duriaw, ka la ioh ban rung shapoh ka bynta ba don ki kor ‘engine’ jong ka Mersin, la ong ka Besiktas Shipping ha ka kyrwoh ba la pynmih ha ka website jongka. Watla katta, la ong ba katei ka jhad kam shym don jingthud bad baroh kiba shong hapoh, naduh ki nongtrei bad ki dkhot treikam jongka baroh ki don hapdeng ka jingshngaiñ bad kam shym la don kano kano ka jingma ia kiba shong hapoh.
Kane ka jingjia ka dei ka sien kaba lai ha ki lai sngi kaba la ktah ïa ki jhad kit umphniang jong ka Russia. Uwei u briew uba tip bha ïa kane ka kam u la ong ba dei ka tnat pahara jong ka Ukraine, kaba don sha lyndet jong ki ar tylli ki jingjia kiba kum kine ha ka Black Sea kiba ïadei bad ki jhad tanker kiba thylli ha kaba kut jong ka taiew ba la dep.
Ka Besiktas ka la ong ba ka kyrshan ïa ki jingtohkit halor kaei ka daw jong ki jingbthei bad ba ka dang ïatreilang bad ki nongshim insurance bad ki bor synshar ka Senegal ban pynïaid ïa ki jingma kiba lah ban mih na katei ka jingjia.
Ka kompeni ba dei khmih ia ki jhad – ka Kpler, ka ong ba katei ka jhad ka kit ia ka umphniang. Ka la leit sha ki kad ieng jhad jong ka Russia la bun sien hapoh jong une u snem.
Ka Mersin ka la shong shngaiñ hadien ba ka la ïaid lyngba la bun por ha kum kine ki kam bad mynta ka don hapoh ka jingiarap bad jingpeit bniah ba man ka por jong ki bor ba dei khmih, la ong ka bor pyniaid kad lieng jong ka Senegal. Ki bor pyniaid ki dang phah pynbha shuwa da kaba set noh shwa ia ki bynta ba la jot bad julor jong katei ka jhad khnang ba yn lah ban pynbha biang ia ka sha ka jinglong ba ka dei ban long bad hadien kata pat, yn pynkynriah ia ki mar ki mata kiba don hapoh jongka, kumba ju dei ban leh.
