Shillong, Nohprah 02
Ka Shillong Lajong ka la long ka kynhun kaba nyngkong eh ban jam sha ka semi final ha ka SSA Champions Cup 2025 hadien ba ka la lah ban pynliem noh 2-0 kol ïa ka kynhun ki khyndai ngut ki rangïalehkai ka Laitkyr-hong ha ka sngi Ba-ar ha SSA Stadium kaba ha First Ground, Polo.
Hadien ki lai sien ïakhun, ka SLFC ka la lah ban kamai 9 poiñ na ka bynta ban lamkhmat ha ka Group-B. Katba ha kawei pat ka jingïakhun hapdeng ka Langsning bad ka Meghalaya Police ki la ïakhaid mar 1-1 kol ha ka Group-A. Watla ki la ïaryngkat mar 7 poiñ na ki lai sien ïakhun, ka MLP ka la tam ïa ka Langsning lyngba ka jingïapher ha ka jingthep kol.
U Ïohborlang L Lyng-khoi (69) bad u Babysun-day Marngar (74) ki la long ki nongthep kol na ka bynta ka Lajong bad kane ka long jingthep kol kaba duna. Ha kawei pat ka liang u Everestarly Rynjah (12) u la pynkhih jar ïa ka MLP hashwa ba u Manbhalang Nongmin (30) un pynïakhaid na ka bynta ka Langsning.
Ka Laitkyrhong ka la shah rem da 1-0 kol ha ka Nongkseh ha ka taïew ba la lah, hashwa ba kan wanphai da ka jingjop ïa ka Mawkriah West da 5-2 kol, ka la khmih lynti ban khanglad ïa ka Lajong hynrei kam shym la urlong.
Ka jingïalehkai jong ka Group-A ha ka sngi Balang kan long hapdeng ka Mawkasiang pyrshah ïa ka Umlyngka ha ka por 1 baje mynsngi, katba ha ka Group-B, Mawlynrei ïa ka Mawkriah West ha ka por 4:30 nohphai sngi. Kine ki kynhun ki la khmih lynti ban khur ïa ki lai point kiba nyngkong ha kane ka jingïakhun.
