Shillong, Nohprah 02
Ka Meghalaya ka la lah ban ïalehkai bha ha ka sngi kaba ar ha ka lympung ïalehkai U-19 men’s Cooch Behar Trophy 2025-26 (plate group) pyrshah ïa ka Arunachal Pradesh, ha kaba ka la kamai 298/5 ha ka pali kaba ar bad u Angkit Tamang u la kamai ‘century’ ha ka sngi Ba-ar ha madan ïalehkai kriket jong ka MCA ha Polo.
Te kumta ka Meghalaya ka la lah ban tam da kaba kamai 367 run. Kham mynshwa, ka Arunachal ka la sdang biang ïa ka pali ïalehkai kaba nyngkong da kaba kamai 94/6 ha ka jingpyrshang ban beh ïa ka thong ba la buh da ka Meghalaya da 205 ha ka pali tied kaba nyngkong. Hynrei ka Arunachal ka la lah ban kynjoh sha ki 136 bad ban pynlong ïa ka Meghalaya ban tam da 69 ron.
Ha kane ka jingïakhun ka Arunachal ka la sdang da kaba tyngeh ha ka por mynstep bad ka la kamai 96/8 namar ka jingïalehkai bha ki nongkawang bol kiba kynthup ïa u Gaurav Narleng bad u Apandanka Marak kiba la lah ban pynhap wiket kham kloi. Hynrei ka jingïalehkai bha u Armaan Jain (25 no out) ka la pynlong ïa ka Arunachal ban kynjoh sha ki 136.
U Narleng u la long u rangïalehkai ba kynsai ka Meghalaya ha kaba u la lah ban pynhap 3/28 na ki 9 over, katba u Mewankitbok Kharpuri u la ïoh 3/31 ha ki 15.2 over. Kiwei pat kiba la ïoh pynhap wiket ki long u Apandanka (2/26 na ki 11), Benedict Jones Makdoh (1/15 na ki 3) bad u Angkit (1/16 na ki 6).
Ka Meghalaya ka la donkam ban ïalehkai bha ha ka pali tied kaba nyngkong, hynrei ka la hap noh kloi ki wiket bad u Sameer Choudhury u la shongthait noh namar ka jingmynsaw.
Nangta u Dipayan Nandi bad u Narleng ki la ïatied lang 83 run. Khamtam eh u Dipayan uba la lah ban kamai 94 ron na ki 80 bol ryngkat bad 15 tylli ki ‘four’ bad kawei ka ‘six’. Katba u Narleng u la ïoh 32 run.
Kumjuh u Angkit u la pynkut ïa kane ka sngi da ka 87 (not out) na ki 120 bol, kiba kynthup ïa hynñiew tylli ki ‘four’ bad kawei ka ‘six’. Te kumta u la ïasoh lang ryngkat bad u Rudra Singh Rathor (12 not out) ha kaba kine ki arngut ki la khmih lynti ban pynlong ïa ka Meghalaya ban tam sah ki 400 run ha ka sngi kaba bud.
