Shillong, Nohprah 02
U Myntri Rangbah ka Jylla, u Conrad K. Sangma, u la pynpaw ba ka dang kloi eh ban ong eiei halor ki khubor thmu pynïasoh NPP jong u nongïalam ka UDP, Bah Paul Lyngdoh.
“Ngi ïadei paralok bha, ngi ju ïakren lang shaphang ka saiñ pyrthei…nga sngew ba ïa mynta hi ban poi sha ka jingkren kut ba un sa pynïasoh bad kine kiei-kiei baroh, nga sngew ba ka dang kloi eh ïa mynta, kam dei ka por kaba biang ban ïakren ïa kine kiei-kiei baroh,” ong u Conrad, da kaba bynrap ba kum kine ki jingïakren ki ju jia ha ka saiñ pyrthei.
Kane ka jingkren u Conrad ka long hadien ka jingmih khubor ba u Bah Paul u lah ban kynriah noh sha ka NPP, hadien ba ka la don ka jingbujli ha ka Kynhun Myntri ha u bnai Nailur, 2025, ha kaba u Bah Paul u la shah pynhiar shuki kum u Myntri ka tnad kam jngohkai pyrthei.
Kane ka jingbujli shuki ka la sakhi ruh ïa ka jingshah weng noh jong 8 ngut ki Myntri, kynthup ïa u Bah Paul, bad 8 ngut ki kiwei pat ki bathymmai kiba la rung sha ka Kynhun Myntri.
U Conrad u la ban jur ba ka saiñ pyrthei ka kynthup ïa ki jingïakren hynrei ha kaba kut, ïa ki rai yn sa pynpaw ha ka por kaba biang.
“Ka don shibun ka politik kaba jia. Ha ka sien kaba la dep, don kiba ïathuh ïa nga ba ki don ki MLA ka NPP kiba thmu ban mih noh bad nga la kylli na phi ha kata ka por ban sngewbha ai ïa nga ïa ki kyrteng jong kito ki MLA ka NPP, ngan sa ïakren bad pynsngewthuh sha ki ba kim dei ban mih. Kumta, kane ka jia ha ka saiñ pyrthei, ki don shibun ki jingïakren kiba jia hynrei ha kaba kut jong ka sngi, ieh ngin ïa peit kumno kiei-kiei ki long ki man bad ynda la poi ka por kaba khatduh, ngin sa pyntip sha phi,” u la bynrap.
