Chennai, Nohprah:
U Myntri Rangbah ka jylla Tamil Nadu u M K Stalin u la pynlong ïa ka jingïalang bishar bniah bad ki ophisar jong ki tnad bapher bapher ha Secretariat ha ka lah sngi U Blei ban bishar bniah ïa ka jingjulor na ka daw ka jinghap slap bad ki lad pynbha kiba la pynlong ha ki jaka ba la shah ktah.
Ka ‘erïong Ditwah ka la wanrah ïa ka jinghap slap kaba jur sha ki distrik bapher bapher jong ka jylla.
Ka jinghap slap kaba jur bha ha ki bynta jong ka distrik Nagapattinam, Mayiladuthurai, Tiruvarur, Thanjavur bad kumjuh ruh ha Ramanathapuram ha kine ki khyndiat sngi ba ladep.
U Myntri Rangbah u la dep ban pynlong ïa ka jingïalang kaba kum kane ha ka 27 tarik u Naiwieng ha kaba ïadei bad ki kam pynkhreh na ka bynta ka aïom Lyiur.
U la pynlong ruh ïa ka jingïalang lyngba ka durkhih bad ki nonglum khajna jong ki 14 tylli ki distrik halor ki lad jingïada ba la shim.
Hadien kata, u Myntri Rangbah u la bishar bniah ïa ki jingjulor na ka daw u slap bad ki jaka rep kiba la shah ktah.
Ha kane ka jingïalang la leit ban ïashim bynta da u Chief Secretary u N Muruganandam, ki heh ophisar kiba kham halor na ka tnad khajna, ka tnad pynïaid ïa ki jingjia ba sngewsih bad ka tnad ka rep ka riang.
U la bthah ruh ïa ki heh sorkar ba kin shim ïa ki lad ki lynti ban pyntuid noh mardor ïa ka um slap kaba la sahkut.
U Myntri Rangbah u la bthah ïa ki heh sorkar ban ai jingïarap na ka State Disaster Relief Fund sha ki jingthung jingtep kiba heh 4,235 hectare bad ki jingthung jingtep kiba heh 345 hectare kiba la shah ktah namar ka jingjur slap ha u bnai Risaw.
U la kyrpad ruh ïa ki ban pynthikna ba ki briew kiba la pynkynriah sha ki 39 tylli ki jaka ai jingïarap ha ki jaka bapher bapher kin ïoh ïa baroh ki jingdonkam ba kongsan kynthup ïa ka bam, ka um dih bad ka koit ka khiah.
