Nongpoh, Nohprah 02
Ki paidbah nongshong shnong ka Meghalaya bad Assam kiba don hapdeng ka jingïakynad kaba la mih na ka daw jong ka jingshah tah rong ïong u mawnongrim jong ka skhim MGNREGA ka pung shnong Maikhuli ha ki briew na Assam ha kine ki khyndiat sngi ba la dep, ha ka sngi Ba-ar ki la poi noh sha ka jingïasuk bad ïasoi ruh ïa ka soskular ban im suk im saiñ nangne shakhmat.
Ha kane ka jingïasoi soskular hapdeng ki paidbah nongshong shnong katei ka thaiñ khappud ka Ri-Bhoi bad Assam, la wan ban ïadon bynta da ki briew jong ka Peace Committee ka Jylla Assam, ki paidbah nongshong shnong ka Maikhuli, ki kynhun seng bapher-bapher na Meghalaya bad ruh u Eric Kevin Dkhar, Majistor ka Ri-Bhoi District.
Ïa katei ka soskular la ïasoi ha ka jingïalang kaba la pynlong ha ka janmiet jong ka sngi Ba-ar ha ka shnong Maikhuli, ha kaba san ngut na ka Jylla Assam bad san ngut na Meghalaya kila ïasoi ban pynthikna ba kin ïa im suk im saiñ, kin ïa sngewthuh jingmut bad burom mar kylliang bad ruh ban ailad biang na bynta ban pynïeng ïa ki post ilektrik kiba la shah pynkhyllem ha ki bnai ba la dep.
Nalor kata, la ïa rai ruh ban shah biang ïa ki nongshong ka Maikhuli ba kin thoh dak biang ïa u mawnongrim jong ka skhim MGNREGA ka pung shnong uba la shah tah rong ïong ha ki ‘riew shim kabu ha kine ki khyndiat sngi ba la dep nalor shibun kiwei-kiwei de ki kular ban nym pynmih shuh ïa ka huri hura ha katei ka thaiñ khappud.
Na ka liang jong u MLA ka Jirang uba dei ruh u Myntri Sorkar ba dei khmih ïa ka tnad Community and Rural Development, u Bah Sosthenes Sohtun, u la ïathuh ba kum u nongmihkhmat bad ka Sorkar, kim kwah satia ban ïohi ïa ka huri hura ha kine ki shnong khappud bad ïathuh ruh ba tang mar ïa ïoh jingtip halor katei ka kynrum kynram, na ka liang ka jong u, u la pyntip mar-mar sha u Myntri Rangbah ka Jylla bad ruh ïa u Symbud Myntri Rangbah bad bthah ruh ïa u Deputy Commissioner ha ryngkat ki bor pulit ba kin shimkhia ban leh eiei khnang ban pynthikna ba kum kine ki jingjia ba sngewsih bad huri hura yn lah ban weng noh bad ba ki paidbah nongshong shnong kin im suk im saiñ.
