Shillong, Nohprah 02
Ka Director jong ka tnad Social Welfare, ka Kong Camelia Doreen Lyngwa ha ka 2 tarik u Nohprah 2025, ka la pdiang ïa ki 24 ngut ki khynnah kiba la wan ïalam noh na Chikkaballapur District, Karnataka.
Kine ki khynnah ki la poi suk poi saiñ ha Shillong bad la pdiang sngewbha ïa ki ha ophis jong ka tnad Social Welfare ha ka jingdon lang ki ophisar ka tnad, ka Chairperson jong ka State Commission for Protection of Child Rights bad ki kynhun bapher-bapher.
Kine ki 24 ngut ki khynnah ba hapdeng 8-13 snem ka rta, ki dei kiba la shah ïalam ban leit pule ha Karnataka.
Kine ki khynnah ki kynthup ïa 10 ngut kiba dei na East Khasi Hills, 7 ngut na East Jaiñtia hills, 6 ngut na West Jaiñtia Hills bad 1 pat na West Khasi Hills, kiba la shah kular ba kin ïoh ïa ka jingpule ei nalor ka hostel.
Kane ka jingjia ka la paw pyrthei hadien ba ka Chairperson ka Child Welfare Committee ka Chikkaballapur, Karnataka, ka la ai jingtip sha ka Director ka tnad Social Welfare myn ha ka 2 tarik u Nailar, 2025, ba ki don 24 ngut ki khynnah na Meghalaya kiba la ïoh ban pyllait na ka Sowmya Kesanupallii Student Hime, Peumale, Chikkabalapur District.
Haba kren ha kane ka sngi, ka Chairperson jong ka State Commission for Protection of Child Rights (SCPCR) ka Agatha Sangma, ka la pynpaw ïa ka jingkmen ba kine ki khynnah ki poi suk poi saiñ ha Shillong.
Ka la ai khublei ruh ïa ki tnad bapher-bapher na ki ar tylli ki Jylla, kata na ka Jylla Karnataka bad Meghalaya kiba la ïatreilang bad peit ba kine ki khynnah kin poi suk ha ryngkat ka met kaba koit kaba khiah.
“Nga sngewkhia ba kumne ki jingjia ki la jia teng ha kine ki bnai kiba la dep ruh, kaba pynlong ïa ka Commission ban shimkhia bad ban peit lem na ka bynta ka jingeh jong ki,” la ong ka Agatha.
Ka la ïathuh ruh ba ka SCPCR ka la thoh sha u Myntri Rangbah ka Jylla, ban buh noh da ka Standard Operating Procedure (SOP) na ka bynta ka jingïalam ïa ki khynnah kiba hapoh 18 snem ha shuwa ba kin ïalam sha ki jaka pule. “Ka Commission ka la ïa shong pyrkhat bad ki ophisar jong ka tnad aiñ, Social Welfare, ka tnad pule-puthi, ka koit ka khiah bad ka tnad pulit ruh kumjuh,” la bynrap ka Agatha.
Ka Agatha ka la kyntu ruh ïa ki kmie ki kpa ba kin peitngor haba ïa dei bad ki khun ki kti, khnang ba kin lait na kino-kino ki jingeh.
Nalor kata, ka la pynpaw ruh ïa ka jingsngewkhia halor ka jingphah ïa ki khynnah sha kiwei ki Jylla ba kin leit pule skul, kaba ju lam bunsien sha ka jingshah lehbeiñ da ki seng kiba kam ban plie lad plie lynti ïa ki.
Ha kane ka sngi la ïoh ruh ïa ka jingkren na ka Director jong ka tnat Social Welfare ka Kong Camelia Doreen Lyngwa.
