Shillong, Nohprah 02
Ka jinglong jingman ha khappud jong ka Meghalaya-Assam kumba ka long mynta ka la long kaba jai-jai, la pynpaw u Bah Nujorki Sungoh, MLA ka UDP na Mookaiaw.
Ka Sorkar ka la shim ïa ki lad ki lynti ban wanrah ïa ka jingshong shngaiñ, kynthup ruh ka jingpynïeng ïa ki outpost ha Khatarsla, Mukroh bad Barato, la ong u Bah Nujorki haba kren sha ki nongthoh khubor ha ka sngi Ba-ar da kaba kdew ïa ka jingjia ba dang shen ha ka shnong Lapangap ha West Jaiñtia Hills district.
“Ngi kwah ban pynthikna ba kum kine ki jingjia bad jingeh kim dei shuh ban dang jia nangne shakhmat,” la ong u Bah Nujorki bad bynrap ruh ba ka Sorkar ka dang ïakren bad ki bor khmih jong ka Assam ban pynbeit ïa kane ka mat.
U Symbud Myntri Rangbah u la khot ïa ka jingïalang bad ka jingïakren ruh ka la ïaid shakhmat.
U Bah Nujorki u la ai ka jingkular ba ka jingdon jong ki nongap pahara yn pynbiang ha ki thaiñ khappud bad ha ki outpost ban peitngor ïa kino-kino ki jingjia. Ka Sorkar ka dang kwah ban ïakynduh bad ki nongshong shnong ban ïakren kham bha shuh-shuh halor kane ka mat, hynrei ym pat buh satia ïa ka tarik.
