Shillong, Nohprah 02
Ka Board of Control for Cricket in India (BCCI) ka la khot jingïalang ïa u coach ka India, u Gautam Gambhir, ryngkat u Ajit Agarkar uba long u khlieh duh jong ka selection committee bad katto katne ngut kiwei pat ki heh hashwa ka jingïalehkai jong ka ODI kaba ar pyrshah ïa ka South Africa ka ban long ha ka sngi Balang na ka bynta ban ïakren kyrkieh ïa ki katto katne ki mat ba kongsan.
Kane ka la wan hadien ba ki rangïalehkai ba paw jong ka ri, u Virat Kohli bad u Rohit Sharma, kiba baroh arngut ki la kiew biang sha ka rukom ïaleh-kai kaba long ka nuksa ha ki khyndiat tylli ki jing-ïalehkai ba la dep.
Katkum ka khubor, la ong ba ka jingïakren ka lah ban don lang u secretary ka BCCI u Devajit Saikia, u joint secretary u Prabhtej Singh Bhatia, u Gautam Gambhir, bad u chairman ka selection committee u Ajit Agarkar. Ka khubor kam shym la pynthikna la u president ba thymmai jong ka BCCI, u Mithun Manhas, un ïadon lang ne em. Da kane ka jingïalang la khmih lynti ba ki rangïalehkai kum u Kohli, u Rohit bad kiwei kiwei ki lah ban paw ha kane ka jingïakhun.
Ki khubor ki ïathuh ba u heh jong ka BCCI u la ong ba ïa kane ka jingïalang la buh ban pynthikna ïa ka ‘jingjied kaba ïahap’ ha ka kynhun khnang ba kan lah ban ïalehkai bha.
Kane ka jingïalang ka thmu ban weng ïa ki jingduna kiba la lap ha ka kynhun ïalehkai jong ka India ha ka jingïalehkai Test series ba dangshen ha la ïing pyrshah ïa ka South Africa. Da ka jingïadon lang baroh arngut u Gambhir bad u Agarkar ha ka jingïalang, ka board ka thmu ban ïoh ïa ka jingshai halor ki katto katne ki bynta jong ka jingpynïaid bad ban thmu ïa ki sienjam ka ban wan.
“Ha ka samoi ïalehkai Test ha la ïing, ki la don ki khep jong ki buit kiba pynkulmar jingmut hapoh bad shabar madan. Ngi kwah ïa ka jingshai bad ka jingthmu shakhmat, kham – tam eh ba ka jingïalehkai Test ban wan ka dangsah sa 8 bnai,” ong une u heh ka BCCI.
