Shillong, Nohprah 02
Ka State-BJP ka la shimkhia halor ka jingkren ba dang shen jong u Bah Vincent Pala bad kam pdiang satia ïa ki jingkynnoh ba khlem nongrim bad bym shisha jong u ba ka ‘One North East’ ka dei ka buit jong ka BJP.
“Ngi sngewsih shibun ba u ‘riew saiñ pyrthei ba rangbah kum u Bah Pala u lah ban pynmih ïa ki jingkren kiba khlem don wat tang khyndiat ruh ka jingpynshisha ne kano-kano ka sabut,” ong u nongaiktien ba rangbah ka BJP-Meghalaya Pradesh, Bah Mariahom Kharkrang ha ka kyrwoh khubor.
Ban pynmih ïa ki jingkynnoh ki bym don nongrim, ki bym don jingkyrshan bad kiba khlem ka jingpynshisha katba dang pyrta na jrong tnum ïing, ka la kylla long ka jingmlien jong ka Congress ha ka ri baroh kawei, u la ong.
“Ngi kwah ban kdew sha u Bah Pala ba ka BJP ka synshar pura ha lai tylli ki Jylla ha ka Thaiñ Shatei Lam Mihngi bad ka don ka jingmihkhmat ha ki Sorkar NDA kiba synshar ha ki ar tylli kiwei pat ki Jylla kiba kongsan jong ka thaiñ,” ong u Bah Kharkrang.
U la ong ruh, “Kum ka seng ngim donkam ïa ka buit, ngi shah jied na ka por sha ka por ban wan biang ha ka bor namar ka jingsynshar kaba bha bad ka rukom pynroi kaba kynthup lang jong ngi – ngi ïoh ïa ka jingkyrshan jong ki paidbah lyngba ka saiñ pyrthei kaba shai, kiei-kiei kiba ka Congress kan ym sngewthuh.”
Shuh shuh u la bynrap ba utei u nongïalam ba rangbah u dei ban kynmaw ba ka BJP ka pynïaid ïa ka Sorkar ha Arunachal Pradesh bad ka don bun ki MLA ha Nagaland, ar tylli ki Jylla kiba kongsan bad kiba bun ki ‘riewlum.
“Kumta ban ong ba ki ‘riewlum ka Thaiñ Shatei Lam Mihngi kim sngewtynnad ïa ka BJP ka long kaba bakla shibun,” u la ong.
“Ka Congress bad ki dkhot jong ka ki dei ban pynshisha shuwa ïa ki jingtip hashuwa ban pynmih ïa kum kine ki jingkren. Lane kata ka long kaba eh than ban pan na u Rahul Gandhi bad ki paralok jong u?” pynkut ka kyrwoh na u Bah Kharkrang.
