Shillong, Nohprah 02
Ka Meghalaya State Commission for Women, ha ryngkat ka jingïatrei lang bad ka National Commission for Women na New Delhi, ha ka 2 tarik u Nohprah, 2025, ki la pynlong ïa ka jingïalang ban ïakren ha kaba ïadei bad ka Prevention of Sexual Harassment at Workplace Act lane ka POSH Act, kaba la pynlong ha State Convention Centre, Shillong.
Haba ai jingkren ha kane ka sngi, ka Chairperson jong ka Commission, ka Kong Iamonlang Syiem, ka la ong ba bunsien ki kynthei kim don shuh ka jingshngaiñ wat ha ïing lade ruh.
Ka Kong Iamonlang Syiem ka la pynkynmaw ruh ïa kawei ka kyntien kaba ong, “From the womb to the tomb” kaba mut “Naduh napoh kpoh haduh ha jingtep”.
“Ki kynthei bunsien kim shngaiñ shuh wat ha sawdong sawkun ne ha ïing lade ruh, khamtam kiba la shah ban beiñ ha la ki jong ki kurim,” ka la ong.
Nalor kata, ka la ong ba ki shynrang ki dei ban ïa shim bynta lang ha kum kine ki jait jingïalang, khnang ban sngewthuh bha shaphang ki kyndon jong kane ka aiñ kaba ïada ïa ki kynthei na ka jingshah ban beiñ ha kino-kino ki jaka.
Kumta, ka la ong “Ka ktien, ka jait ktien kaba la bret ha ngi, ngim dei ban shah ïa kata bad nga sngewkmen ba bun-bun snem ka tnad bad phi tip ki jaka pule ki don ïa kine ki komiti ban sumar ban pynlong ïa ki katto-katne ki jaka kiba shngaiñ na ka bynta ki kynthei”.
“Ngi sngewkmen shibun ba ngi don ki nongmihkhmat ki ban sa kren shaphang ka ‘POSH act’ dei na kata ka daw ba ngam shym la kwah ban leit shata, hynrei lah ban buh ha ka jingmut kawei, ba wat haba ngi kren shaphang ki aiñ, ngi kren shaphang kino-kino ki aiñ, ki aiñ ki don kum ka jingkynthoh, bad ka jingkynthoh ïa kaei-kaei kaba ym dei,” la ong ka Kong Iamonlang.
