Nongstoiñ, Nohprah 02
Ha ka sngi Ba-ar jong ka taïew ka ophis jong ka District Social Welfare Officer ka West Khasi Hills District, ka la ïoh ban rakhe ïa ka sngi jong ki briew kiba don jingduna ha ki dkhot met (International Day for Persons with Disabilities) hapoh ka phang “Fostering Disability-Inclusive Societies” na ka bynta ban kyntiew ïa ka jingkiew ha ka imlang sahlang,” bad ïa kane ka prokram la ïoh ban pynlong ha ka ïingdorbar jong ka R.L. Iew Rambrai.
Ha kane ka sngi u Bah E. Lyngdoh, MCS, BDO Rambrai C&RD Block u la long kum u Kongsan, ha ka jingïadonlang ka Kong D. Pakyntein, ka DSWO, u D. Biswas ka Rehabilitation Officer ka National Career Service Centre for Differently Abled, ka Sorkar India, ka Kong M.B. Sawkmie, Physiotherapist & Manager, DRCDA Nongstoiñ, Bah M. Diengdoh, DEF I/C UDID Mawkyrwat, nongmihkhmat na ka DLSA, bad kiwei.
U Bah E. Lyngdoh haba kren kum u kongsan, u la pynpaw ïa ka jingkmen jong u ban don bynta lang ha kane ka sngi na ka bynta ki briew kiba don jingduna ha ki dkhot met hynrei kiba lah pat ha kiwei pat ki liang.
U la pynpaw ba ki briew kiba don jingduna ha ki dkhot met kim dei ban sngew lehrain ne sngew poh satia, hynrei ki dei ban sngewbha ïa la ka jong ka jingim bad ban sngew mar katjuh ha ka imlang sahlang.
U la pynpaw ba ha kane ka juk mynta, ki briew kiba don jingduna ha ki dkhot met ki don ka lad ban ïashim ha ki jingïakhun eksamin kiba pher, ki jingïalehkai, bad ki kam bapher-bapher kiba pynshong nongrim ha ka jingtbit.
Shuh shuh u la ong ruh ba ka Sorkar ka la wanrah bun tylli ki skhim bad ki prokram jingïarap na ka bynta ban kyrshan ïa ki.
U la ban jur ruh halor ka Rights of Persons with Disabilities Act, 2016, ka aiñ kaba ïada ïa ka hok jong ki, bad u la pynshlur ïa ki briew kiba don jingduna ha ki dkhot met ban pynrung kyrteng ïa ka UDID card ban ïoh ïa ki jingmyntoi bapher-bapher jong ka Sorkar.
U la pynkynmaw ruh ïa ki paidbah ïa ka kamram jong ki ba kin kiar na ka jingñiew beiñ ïa ki, hynrei ban ai jingkyrshan ïa ki ha kano-kano ka por ba donkam.
Ha kane ka sngi, ki nongmihkhmat na kiwei pat ki tnad ki la ïasam ruh ïa ki jingtip kiba kongsan shaphang ka hok jong kiba duna dkhot met, ki jingïarap aiñ, ki skhim jingïarap, bad ki rukom jingïarap bapher-bapher kiba lah ban ïoh da ki briew kiba duna dkhot met.
Kiwei pat ki bynta kiba la lah ban pyndep ha kane ka sngi ki long ka jingot cake, ka jingsam ïa ki khusnam sha ki nongjop ha ki jingïalehkai bapher-bapher ba la pynïaid da ka DSWO, bad ka jingai sngewbha sha baroh ki briew kiba don jingduna ha ki dkhot met kiba don lang ha kane ka prokram.
