Shillong, Nohprah 02
U MLA ka Mawlai Bah Brightstarwell Marbaniang u la pynpaw ba um shym la hun ïa ka jingpyntrei ïa ka lynti ïaid kjat kaba la bei tyngka da ka National Highways and Infrastructure Development Corporation Limited (NHIDCL) ha shnong Mawlai Mawiong Umjapung.
Kane ka jingbym sngewhun u Bah Brightstarwell ka dei haba u leit jurip ha ka sngi Ba-ar ryngkat ki nongïalam shnong Umjapung namar ki lap ba u kontraktor uba ai sub-contractor u la ieh ban shna ïa ka lynti ha ki jaka ba long riat haba ka Sorkar ka la dep mang pisa.
Kane ka lynti ïaid kjat ka dei kaba jrong kumba 700 meter ha ka jingpynlut kaba shi klur tyngka tang ha ka shnong Umjapung.
Haba ïakren bad u Bah Brightstarwell u la ïathuh ba kane ka jingjurip ka dei kaba ar sien namar ka jingwan ujor ki nongïalam shnong namar ka jingbym ihun ïa ka jingshna ïa ka lynti ïaid kjat.
U la ïathuh ba ha kine ki snem ba la dep u la leit jurip naduh thanad Mawlai shaduh Mawiongrim ban peit ïa ka jingbha jingmiat ki paidbah kiba ïaid ha surokbah, namar um kwah ba ki briew bad ki kali kin ïaid lang ha kajuh ka surok, kumta u la kyrpad ïa ka Sorkar ba ka dei ban shna da ka lynti ïaid kjat khnang ba ki paidbah kin nym ïaid shuh na surok.
“Nga sngewkmen haba nga wan jurip bad ki nongïalam shnong namar ngi lap ruh ba ha ka Detail Project Report ki don sa 28 tylli ki ‘street light’ ki ban pynïeng harud ka surok bah, kane ka pyni ba lada ngim wan jurip kine ki ‘street light’ ki lah ban jah klep,” u la ong.
Shuh shuh u Bah Bright u la kular ban buddien ryngkat ki nongïalam shnong ïa ka jingpyntrei ïa ka lynti ïaid kjat khnang ban pynsuk ïa ka ïaid ka ïeng ki paidbah.
U la pynpaw bym sngew ïahap ba u kontraktor uba ïoh ïa kane ka lynti ïaid kjat u dang phah sha u sub-contractor bad kane ka pynsniew ïa ka kam.
Ha kawei ka khubor, u Bah Brightstarwell u la pyni jingdom ïa u manager ka NHIDCL namar u slem ban wan poi ha Mawlai Mawiong Umjapung ban leit jurip ïa ka lynti ïaid kjat kaba la sdang shaid-shaid ka jingtrei.
Kane ka jingleit jurip la ïakut ha ka por 10:00 baje mynstep hynrei u manager ka NHIDCL u dang poi ha Umjapung ha ka por 10:45 baje mynstep.
Haba u Bah Brightstarwell ryngkat ki nongïalam shnong ki la ïaid shakhmat ban jurip, u manager ka NHIDCL u la wan poi bad hangne u Bah Brightstarwell u la pyni jingdom namar kane ka jingslem ka la dei kaba ar sien.
