Shillong, Nohprah 02
U National President ka National People’s Party (NPP) u Conrad K Sangma u la ong ba ka party ka long kaba la khreh ban mad ïa ki jingeh kum ha Manipur, ha kaba ka Jylla mynta ka don hapdeng ka jingkhihwin namar ka jingbym long shngaiñ ha ka shongsuk shongsaiñ bad ha ka saiñ hima sima.
“Ki jingeh kin don beit, bad ki jingeh ki mut ki lad ki lynti ruh,” la ong u Conrad haba kren sha ki nongthoh khubor hadien ka jingpynkup burom ïa u President ka NPP ka Jylla Manipur, u Dr. Lorho S Pfoze.
Ha kane ka sngi la pynkup burom ïa u Leader of Legislative Party, u Rameshwar M. Singh bad u Chief Whip u Loken Singh bad ar ngut ki Working President, kata u Janghemlung Panmei bad u Noorul Hasan.
U Conrad u la ong ba ka party hapoh ka jingïalam jong u Dr. Lorho S Pfoze, kan trei ban pynkylla ïa kine ki jingeh sha ki lad ki lynti.
“Ngi kyrmen ba ngin lah ban pynkylla ïa kita ki jingeh sha ki lad ki lynti bad ban kiew kum ka Party” u la ong, da kaba bynrap ruh “Ka Jylla Manipur ka ïaid lyngba ki por kiba eh bad kiba jynjar bad namar ka jinglong jingman ha ka thaiñ bad ka jinglong jingman khamtam ha kine ki ar snem shiteng, ka jingbym shngaiñ ha ka shongsuk shongsaiñ baroh kawei, ka la don shibun kine ki jingeh ha ka saiñ hima sima bad ngi ngeit ba hapoh ka jingïalam jong u Lorho kan sa pynbeit ban shim ïa kita ki jingeh bad kaba kham kongsan ban pynkylla ïa ki kumba nga la ong sha ki lad ki lynti na ka bynta ka seng baroh kawei.”
Ha kaba ïadei pat bad ki jingkynthoh ba la pynpaw da ki nongïalam ba rangbah jong ka party, u Conrad u la ong “Ngi burom ïa ki jingkynthoh jong baroh ki nongïalam ba rangbah jong ngi. Ka party jong ngi ka dei ka party synshar paidbah. Ngi ngeit ha ka jingai jingmut ne ka jingpynpaw jong baroh”.
“Ka NPP ka pynleit jingmut ha ka ban trei na ka bynta baroh ki jaidbynriew ha Manipur bad ka thaiñ,” la pynksan u Conrad.
U Conrad u la ong ruh “Ngi dei ka party kaba ïa tylli. Ngi ngeit ban trei na ka bynta baroh ki jaidbynriew ha ka Jylla bad kumjuh ha ka thaiñ”.
Ka thong jong ka party ka long ban shakri ïa ki paidbah ka Manipur bad ka thaiñ Shatei Lam-Mihngi jong ka ri India, da ka jingangnud ban ïatylli bad ka roi ka par. “Ngin sa ïa trei lang bad baroh bad peit ïa ka jingmyntoi jong ka Jylla Manipur bad ka thaiñ Shatei Lam-Mihngi baroh kawei,” la ong u Conrad.
“Ka jingshemphang jong u Dr. Lorho kum u nongmihkhmat ha Parliament bad ka jingaiti lut jong u na ka bynta ki paidbah bad ka thaiñ, ka pynlong ïa u kum u briew uba paka ban ïalam ïa ka NPP ha Manipur,” la bynrap shuh-shuh u Conrad.
U Conrad u la ban jur ïa ka jingthmu jong ka NPP ban shakri ïa ki paidbah bad ïa ka thaiñ, da kaba ong, “Ngi don hangne ban ai ïa ka khubor kaba bha, ban pynïatylli bad phah ïa ka khubor jong ka jingïatylli jong ka thaiñ baroh kawei”.
Ka NPP ka thmu ban pynkhlaiñ ïa ka jingdon jong ka ha Manipur bad ka thaiñ Shatei Lam-Mihngi, ha kaba la khmih lynti ba u Pfoze un don ka bynta kaba kongsan ha ka ban pynbeit ïa ka party bad pynkhreh na ka bynta ka ilekshon 2027, u la ong.
U Conrad Sangma u la pynthikna ruh ïa u Pfoze ïa ka jingkyrshan jong ka National Committee, da kaba ong, “Ngin ïa trei lang bad phi ban pynthikna ba ngin lah ban pynlong ïa ka party ha ka lynti kaba dei bad kaba bha ïa baroh”.
