Srinagar, Nohprah:
Ka Pakistan ka la shna bad pyntreikam biang ïa ki 72 tylli ki jaka siat na ka bynta ban leh ïa ki kam thombor ha ki bynta jong ka khappud Jammu naduh ba la pyntreikam ïa ka Op Sindoor, la ong u heh ka tnat BSF.
Kumba la ïathuh, la ong ba ki la don baroh 118 tylli ki jaka siat jong ki nong Pakistan kiba la thmu ïa ki jaka ba shakhmat jong ki shipai BSF ha shilynter ka khappud bad ka LoC ha ka jylla Jammu kiba la shah pynjulor ha ka por ba la pyntreikam ïa ka Op Sindoor, ong u DIG.
Ki la jan don kumba hynñiew bnai hadien ba ka la don ka jingmad ïa ki jingjulor jong ki jaka ba la ker ha ka por ba don ka Operation Sindoor, ba ka Pakistan sa shisien pat ka la pyntreikam biang ïa ki 70 tylli ki jaka siat hajan Jammu, la ong ka tnat shipai BSF.
Ha ki bnai naduh ba la pyntreikam ïa ka Operation Sindoor jong ka India ka la pynjur ïa ki jingpynjulor ïa ki jaka sah bad ki jingtei jong ki lehnoh jong ka Pakistan, ki kynhun pahara ki ong ba ka Pakistan ka la shna bad pyntreikam biang da kaba sngap jar ïa ki 72 tylli ki jaka siat ha shilynter jong u pud u sam jong ka Jammu.
Ki heh ophisar jong ka BSF ki la sngew khuslai ba wat hapdeng ka jingpynbna jong ka Islamabad ban pynkynriah ïa kum kine ki jaka sha ki jaka ba kham jngai, katto katne ki jaka siat ki la mih biang hajan ka International Border bad ha ki bynta jong u LoC, wat haba ka Pakistan ka pyntreikam biang ïa ki jaka ba la iehnoh bad wanrah ïa ki buit pyntreikam kum ka jingpyndonkam ïa ki Drone.
U Deputy Inspector General jong ka BSF u Vikram Kunwar u la ong ha ka jingïalang bad ki nongthoh khubor ha ka sngi Saitjaiñ ba hadien ba ka India ka la pynjulor jur ïa ki jingtei jong ki lehnoh bad ki jaka khappud jong ka Pakistan ha ka por jong ka Operation Sindoor, ka Pakistan ka la shim ïa ka polisi ban pynkynriah ïa baroh ki jaka siat na khappud sha ki jaka ba kham jngai.
“Hynrei, ki jinglong barim ki eh ban duhnoh. Ki 12 tylli ki jaka siat ki la sdang ban treikam hajan u pud u sam ha ki thaiñ Sialkot bad Zafarwal jong ka Pakistan. Kiwei pat ki 60 tylli ki jaka siat ki la mih ha ki jaka ba marjan jong u LoC [hajan Jammu],” u la ong, da kaba bynrap ba ki la buh ïa ka kynhun jong ki lehnoh kaba don ar haduh lai ngut ki lehnoh.
Ym pat don ki jaka ai jinghikai ïa ki lehnoh ha ki bynta jong u International Border ha kane ka por, watla ki don ki khubor ba kum kine ki jaka ai jinghikai ha ki jaka ba jngai ha ki bynta jong u Line of Control, u la ong.
Baroh 118 tylli ki post jong ka Pakistan kiba la thmu ïa ki jaka ba shakhmat jong ki shipai BSF ha shilynter u International Border bad ka LoC ha ka jylla Jammu ki la shah pynjulor bha ha ka por ba la pyntreikam ïa ka Operation Sindoor, u DIG u la ong, 72 tylli ha shilynter u IB ha Hiranagar, Samba bad Jammu, bad 46 tylli ha shilynter u LoC ha Rajouri bad Poonch.
“Ka kor peitngor jong ki ruh ka la shah pynpra”, u la ong. “Ïa kane ka jingtip ym shym la ïoh mar mar hadien ba la sangeh ïa ki jingïaleh pyrshah ha u bnai Jymmang hynrei ka la nang paw katba nang mih ki sngi.”
U Inspector General BSF u Shashank Anand u la ong ba ki Rangers jong ka Pakistan kiba la iehnoh ïa ki kam jong ki ha ka por ba ki leh ïa ka Operation Sindoor ki la wanphai biang, bad “ngi dang peitngor ïa baroh ki kam bad ki jingbuh ïa ki shipai ha ki bynta khappud’.
“Ngi tip hangno bad ha kano ka jinglong bad ki jaka ba ki tih lynti krem”, u la ong da kaba bynrap ba ki BSF ki pyndonkam da ki kor ki bor kiba mynta kum ki Ground Surveillance Radar, ki Electro-optical Thermals bad ki UAV ban ïada ïa ki bynta khappud.
Haba kdew ba ki drone ki la mih kum ka jingma kaba thymmai naduh u snem 2019, u la ong ba ki BSF ki la ïaid ryngkat bad ka jingkylla ka jinglong jingman bad “ngim shym la pyntbit tang ïa ki shipai jong ngi, hynrei ngi la buh ruh ïa ki kor ïaleh pyrshah ïa ki drone”.
Ka BSF’s School of Drone Warfare kaba don ha Gwalior ka la ïasoi ïa ka MoU bad ka IIT Delhi bad ka IIT Chennai ban trei ïa kane, u la ong. “Ngi dang trei beit ïa ka bad ngi sngew ba ka jingthew na suiñ kan don beit ha ki thma ha ki por ban wan ne wat ha ka jingsiat shabar pud”, u la ong.
