Shillong, Nohprah 02
Ka kynhun ki ‘thei ïalehkai ka ri India ka la sdang da ka jingjop ha ka Junior Women’s Hockey World Cup hadien ba ka la lah ban pynliem noh da 13-0 kol ïa ka Namibia ha ka lah sngi U Blei, ha kaba ka Hina Bano bad ka Kanika Siwach ki la khur mar kawei ki hat-trick.
Nalor ka Hina bad ka Kanika, ka Sakshi Rana ka la ïoh ban thep ar kol, katba ka Binima Dhan, Sonam, Sakshi Shukla, Ishika bad ka Manisha ki la thep mar shi kol.
Ha kane ka jingïakhun ka India ka la lah ban ïalehkai bha naduh kaba sdang ha kaba ka la ïoh ban thep saw kol ha ka quarter kaba nyngkong. Ka Sakshi ka la ïoh ban thep kol nyngkong, bad ka Kanika ka la thep ïa ka kol kaba ar. Ka Binima ka la thep ïa ka kol kaba lai da ka jingïalehkai kaba stet bad ïa kawei la thep da ka Sonam na ka bynta ban tam da 4-0 kol ha ki khadsan minit.
Da kane ka jinglah ban thep kol, ka India ka la bteng ban ïalehkai ha kaba ka Sakshi ka la thep ïa ka kol kaba ar jong ka.
Ka India ka la thep ïa ka kol kaba hynriew lyngba ka Sakshi ha ka penalty corner. Ka Kanika ka la thep ïa ka kol kaba ar jong ka na ka bynta ban pynlong ïa ka India ban kynjoh sha ki 7-0 kol.
Da kaba skhem ha ka rukom ïalehkai, ka India ka la bteng ban ïalehkai bha ha ka kylla miet. Ka Hina ka la thep ïa ka kol kaba nyngkong eh ha kane ka lympung lyngba ka corner. Ka Ishika ka la thep ïa ka kol kaba shiphew lyngba ka penalty corner. Te kumta ka Hina kala lah ban khur ïa ka hat-trick lyngba ka jinglah ban thep na ka penalty corner.
Ka Kanika ka la lah ban thep ïa ka kol kaba lai na ka penalty corner na ka bynta ban pynlong ïa ka India ban tam da 12-0 kol. Ïa ka kol kaba khatduh la thep da ka Manisha na ka penalty corner na ka bynta ban pynlong ïa ka India ban khur ïa ka jingjop da 13-0 kol ha kane ka jingïakhun kaba nyngkong.
Ka India hapoh ka jingïalam ka Jyoti Singh, kan ïakynduh pyrshah ïa ka Germany ha ka sngi Balang. Kham hashwa ka Germany ka la jop ïa ka Ireland da 7-1 kol. Te kumta ka India kan ïakynduh pyrshah ïa ka Ireland ha ka sngi Thohdieng.
