Shillong, Nohprah 02
Ki kam tuh kam thiem ki la bteng biang bad ïa kane la lah ban sakhi na ki jingshah tuh kiba dang jia dang shen na kylleng ki bynta jong ka nongbah Shillong bad ruh na kiwei ki bynta jong ka Jylla.
Katkum ka khubor na ki pulit la ong ba u Pratap Das u la ai ka jingujor ba ha ka 27 tarik jong u bnai Naiwieng, ki runar bym lah ban ithuh ki la tuh ïa ka trok dumper jong u, kaba don ïa u registration number ML05-S-1164 na Bholaganj ha East Khasi Hills. Hynrei la ong pat ba ha ka 29 tarik Naiwieng, ïa kane ka trok kaba la shah tuh, la lap ba la ieh noh ha kawei ka jaka bad kham hadien la shimti noh da ki pulit bad buh ha thanad Hatigaon, Assam.
Ha kawei pat ka khubor, ka Junianchi G Momin ka la ai ka jingujor ba ha ka por mynsngi jong ka 28 tarik Naiwieng, ki runar bym lah ban tip ki dei kiei, ki la tuh ïa ka Laptop jong ka na ka kamra jong ka, kaba don ha Mawpat, Shillong.
U Esmond Lyngdoh Sangma ruh u la ai ka jingujor ba ha ka 26 tarik Naiwieng, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AD-6315 na ka jaka sah ka jong u, kaba don ha Lumsohphoh, Lower Mawprem, Shillong.
Kumjuh ruh na ka liang jong u Lalhriattira u la ai ka jingujor ba hapdeng ka miet jong ka 27 bad 28 tarik u Naiwieng, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AF-9428 na ka thaiñ Madanrting, Thembasuk, Block-F, Shillong.
U Lano K Marak u la ai ka jingujor ba ha ka miet jong ka 23 tarik u Naiwieng, ki runar bym lah ban ithuh ki la tuh ïa ka generator kaba la pyndait hapoh ka SBI Mendipathar Branch ha North Garo Hills.
