Washington, Nohprah:
Ka kompeni ‘Apple’, ha ka Sngi Nyngkong ka la thung ia u heh nongwad bniah ba paw nam- u Amar Subramanya, kum u Vice- President jong ka tnat AI jongka, u ban mih bujli ha ka jaka jong u John Giannandrea.
Namar la ong ba ka Apple, kaba dang sahdien ha ka jingiakhun ia ki juk stad ‘AI’ ba mynta, ka la slem ban pyn-urlong ia ki jingdonkam jong ka AI ha ki phone jongka haba ia nujor bad ki nongialeh pyrshah jongka kum ka Samsung Electronics, kiba la kham kloi ban pynthymmai ia ki tiar jongki da ki rukom ka juk jingstad ‘AI’.
U Subramanya un mihkhmat ïa ki bynta ba kongsan, kynthup ïa ka Apple Foundation Models, ka jingwad bniah ïa ka ML bad un ai kaiphod sha u Craig Federighi u heh jong ka Software.
U dang rung sha ka Apple na ka Microsoft, ha kaba dang shen u la shakri kum u nongsynshar jong ka AI. Kham mynshwa, U Subramanya, u la trei 16 snem ha ka Google, ha kaba u la long, nalor kiwei pat ki kam, kum u khlieh jong ka tnat Engineering na ka bynta u nongïarap jong ka Gemini.
U Giannandrea un shakri kum u nongai jingmut jong ka Apple haduh ba un da shongthait noh ha ka aïom Tlang jong u snem ban wan.
Ha kaba sdang jong une u snem, ka Apple, ka la ong ba ïa ki jingpynbha ïa ka jingstad thymmai jong ka Siri, yn pynslem haduh u snem 2026.
Ki la don ki khubor ba u CEO jong ka Apple, u Tim Cook, u la duh jingshaniah ia ka jinglah jong u Giannandrea, u ba dei u heh jong ka AI, ban pyntreikam ia ka jingpynmih ia ki mar jong katei ka kompeni.
