Shillong, Nohprah 03
Ka Drug Reduction, Elimination & Action Mission (DREAM) ka la thied 6 tylli ki ksew sma dien kiba kyrpang, ba kynthup ïa lai tylli ki ksew Belgian Malinois bad lai tylli ki ksew Cocker Spaniel ban pynkhlaiñ ïa ka bor treikam jong ki pulit ka Jylla.
Kitei ki ksew, ki dei kiba shong dor T.12,54,000 lak, ki la shah hikai kyrpang ban lap ïa kiba pyndonkam ïa ki jingdih buaid ha kawei ka jaka sumar ha Bengaluru, naduh u bnai Ïaïong haduh u bnai Naiwieng, 2025.
La ai jinghikai ruh ïa hynñiew ngut ki pulit ka Meghalaya ryngkat bad ki ksew ban pynthikna ïa ka jingpyntreikam jong ki.
Haba ïakren bad u Director ka DREAM u Bah Francis Kharshiing u la pynpaw ba ki ksew kiba ka Sorkar ka la thied ki long ban kyntiew ïa ka jinglah jong ka Jylla ban tehlakam ïa ka jingjyllei u drok, khamtam ha ka ban lap ïa ki jingdih ba pynbuaid.
U la ïathuh ba ki ksew mynta ki dang don ha ka jingpynkylla ïa ka jinglong ka suiñbneng bad yn sa sdang ban treikam ynda ki la sngewtynnad pura haba ki la sah sha Meghalaya namar ka la ïapher ka suiñbneng.
Nangta ki nongpynïaid ba la hikai kin shimti ïa ka kam, ban phah ïa ki ksew na ka bynta ki kam ba ki trei ban ai jingïarap haba ïakhun pyrshah ïa u drok.
“Kumba ka long mynta, ki ksew ki la pyndep hok ïa ka jinghikai jong ki bad ki don hapoh ka jingpeit jong ka ANTF (Anti-Narcotics Task Force) jong ki pulit Meghalaya bad mynta ki dang don ha ka jingpeit ki pulit namar hap ban pynïahap bad ka suiñ bneng bad ka jinglong ka mariang jong ka Jylla Meghalaya,” u la ong.
U la ong biang, ba kane ka por jong ka jingkylla ka long kaba donkam ban pynthikna ba ki ksew ki long kiba suk pura, kiba sngewthuh, bad kiba lah ban treikam bha namar ka ka jingkylla ka suiñbneng,” ong u Bah Francis Kharshiing.
