Shillong, Nohprah 03
U Lat ka Jylla Megha-laya u C.H. Vijaya-shankar, ula ïaroh ïa ka jinglah ka Indian Red Cross Society (IRCS) Meghalaya State Branch ban noh synñiang sha ka imlang ka sahlang ban ai ki lad jingïarap ha kino-kino ki jingjia ba sngewsih bad ki jingshah lynshop ka bor mariang.
Ïa kane u Lat u la pynpaw ha ka jingïalang ba shisien shisnem jong ka IRCS ha Durbar Hall, ka Lok Bhavan ha ka sngi Palei.
U Lat ka Jylla haba kren ha ka jingïalang u la ai jingïaroh bad ai khublei ïa ka jingshakri ka IRCS Meghalaya State Branch kaba la kyntiew ïa ka imlang sahlang. U la pynpaw ïa ka jingnoh synñiang ba kongsan jong ka Society ha ki snem ba la dep, khamtam haba ïadei ka jinglah ka Society ban ïarap ha ki jingjia ba sngewsih, ki jinghikai ai jingïarap nyngkong (first-aid training), ki jingïarap ban ai snam, ka jingai jingsumar ha ka koit ka khiah bad ki jingai jinghikai ban pynsngewthuh ha ki jaka nongkyndong bad ki jaka ba jngai na ka sor.
“Da kaba pdiang ïa ka jingïatreilang hapdeng ka Red Cross bad ki bor synshar Jylla, ka kyntiew ïa ka jingpoi ki lad jingïarap sha ki briew ha Meghalaya” la ong u Lat.
U la ban jur ba ka Red Cross ryngkat bad ki jaka pule ki dei ban long kiba shimkhia bad ba peitngor ha kaba ïalam ïa ki samla pule ba kin long kiba tip ka akor ka burom bad kiba don ïa ka jingkitkhlieh.
U Lat u la ai mynsiem ïa ki nongïalam ka IRCS ba kin bteng ban leh ban pynwandur ïa ka jingim briew bad ha ka imlang ka sahlang. U la ai khublei sha baroh ki nongtreimon sngewbha ba ju kyrshan ïa ka Red Cross Society ha Meghalaya.
Ha kane ka jingïalang la ïadonlang u Bah Sanbor Shullai, myntri ka tnad Arts and Culture, u Bah Wailadmiki Shylla, myntri ka koit ka khiah, uba la shah thung ruh kum u Vice-President jong ka Red Cross Society Meghalaya State Branch, ha ka jingïadonlang ki ophisar ka Red Cross bad ka Sorkar Jylla ba kynthup u River O Wahlang, IFS (Rtd.), Chairman ka IRCS, Meghalaya State Branch, u H.C. Choudhary, Principal Secretary u Lat, u General Secretary ka IRCS bad kiwei-kiwei.
