Shillong, Nohprah 03
U Myntri ka Sorkar Pdeng ba dei khmih ïa ka tnad Information and Broadcasting u Ashwini Vaishnaw u la pyntip sha ka ïingdorbar thawaiñ Lok Sabha ba ka mat ba la wanrah ha kaba ïadei bad ka rynsan ‘social media’ bad ki khubor lamler ka dei ka mat kaba khia bha.
U la ong ba ki khubor lamler ki buh jingma ïa ka synshar paidbah jong ka India bad u la ban jur ïa ka jingdonkam ïa ka sienjam kaba tyngeh ha kaba ïadei bad ki rynsan social media, ki khubor lamler bad ki ‘deepfake’ ba la pynmih da ka AI. U la ïohi ba ka rukom pyndonkam ïa ki social media ka la wanrah ïa katto katne ki jinglong jingman ki bym kwah ban bud ïa ka Riti Synshar jong ka ri India ne ban bud ïa ki aiñ ba la thaw da ka Parliament. U la ban jur ïa ka jingdonkam kyrkieh ban shim ïa ka sienjam ba tyngeh bad ban thaw ïa ki kyndon kiba kham khlaiñ.
Haba jubab ïa ka jingkylli ha Parliament, u Vaishnaw u la pyntip ba dang shen la wanrah ïa ki kyndon ba thymmai, ba kynthup ïa ka kyndon kaba bthah ban weng noh hapoh laiphew hynriew kynta. La pynmih ruh ïa ka kyndon ba la shna na ka bynta ban ithuh bad shim ïa ka sienjam kaba donkam halor ki deepfake ba la pynmih da ka AI bad ki jingïamir jingmut halor kane ki dang ïaid mynta. U Myntri u la ïaroh ïa ka jingtrei jong ka Parliamentary Committee bad ai khublei ïa u Nishikant Dubey bad ïa baroh ki dkhot kiba la ai ïa ka kaiphod kaba bniah kaba don ïa ki jingai jingmut ba kongsan na ka bynta ban pynkhlaiñ ïa ka aiñ.
U Myntri u la ong ba ki mat kiba ïadei bad ki khubor thok bad ki social media ki kynthup ïa ka jingïaryngkat hapdeng ka jinglaitluid ban kren bad ka jingïada ïa ka synshar paidbah bad ka Sorkar ka trei da ka jingsngewthuh kaba pura ïa kane ka jingïahap. U la ban jur ruh ba hapoh ka jingïalam jong u Myntri Rangbahduh ka ri u Narendra Modi, ka sienjam Digital India ka la wanrah ïa ka jingkylla kaba khraw bad ka teknoloji kaba baroh ki lah ban ïoh bynta, kaba dei ban pdiang ïa ki jingktah kiba bha jong ka.
U la ong ruh ba ka Social Media ka la ai ruh ka rynsan ïa man la uwei pa uwei u nongshong shnong. Da kaba shimkhia ïa kine ki bynta baroh, ka Sorkar ka trei ban pynkhlaiñ ïa ki jaka treikam bad ka jingshaniah kaba long ka nongrim jong ka imlang sahlang.
