Nongstoiñ, Nohprah 03
U In-Charge District Magistrate jong ka West Khasi Hills District, Bah HK Thabah, MCS u la pyntip ba ka la don ka jingkiew ha ka jingthang ïa ki khlaw ki btap, ki phlang, ki dieng, bad kiwei-kiwei ki mar khlaw, kaba wanrah ïa ka jingjulor kaba jur ïa ka mariang, ka jingduh noh ïa ki mrad khlaw, ka jingma ïa ka jingshngaiñ jong ki paidbah, bad ka jingjaboh ka lyer.
Ha ka kyrwoh khubor, u In-charge District Magistrate u la ong ba lyngba ka Section 163 jong ka BNSS, 2023, la pynmih ïa kane ka hukum ban khang pyrshah ïa baroh ki rukom thang khlaw hapoh u pud u sam jong ka West Khasi Hills District bad kane ka hukum kan treikam mardor.
Shuh shuh u la ong ruh ba kiba pynkheiñ ïa kane ka hukum, lada lap yn shah pynngat ha ki kyndon aiñ 223 jong ka aiñ BNS, 2023. U la ong ba namar ka jingdonkam kyrkieh, kane ka hukum kan treikam mardor bad u la kyntu ïa baroh ki nongshong shnong ba kin bud pyrkhing bha ïa kane ka hukum.
