Mawkyrwat, Nohprah 03
Hadien ka jingkhynra kyiad kaba jur ïa ki nongdie kyiad be-aiñ ha kine ki bnai ha ïew Maw-kyrwat da ki Seng Long-kmie, Seng Samla Shnong bad VDP ha kaba ki la ïoh ban kurup la jan kot spah synduk ka kyiad phareng bad kumba 500 litre ka kyiad pyrsi, na ka liang u samla Kitborsing Lyngdoh, President ka Seng Samla Shnong Mawkyrwat (SSSM) u la ïathuh ba ka la don ka jingshah byrngem lyngba ka phone ïa ki nongïalam jong ki Seng Longkmie, Seng Samla Shnong bad VDP ïa kiba la suba ba ki dei ki nongdie kyiad.
U samla Kitborsing Lyngdoh u la ong ba um sheptieng ïa ka jingbyrngem jong ki namar ba ki trei ïa ka kam kaba bha bad u la ong ruh ba lada ka don ka jingshah thombor ki longkmie bad ki longkpa, ki samla jong ka shnong kin nym ailad ïa kine ki briew ha ryngkat ka jingïatreilang bad ki bor jong ka aiñ.
U la ïathuh ruh kaba kham sngewsih ha kine ki sngi ka long ba ki khynnah kiba dih drok kiba la ju shah kem teng bad kiba la lait na ki jingshah sumar ki la sdang biang ban dih bad khaïi drok bad u la kyrpad ruh ïa ki bor jong ka aiñ ba kin ai ka jingïatreilang.
U Bah B Jyrwa, Superintendent of Police jong ka SWKHD ha kaba ïadei bad kane, u la kular ba ka tnad pulit kan ai ïa ka jingïatreilang bad ki nongïalam shnong bad kumjuh ruh ba kin ai ïa ki number phone jong kita kiba byrngem khnang ba ki bor jong ka aiñ kin leh ïa kaba donkam.
