Shillong, Nohprah 03
U Nongïalam ka Trinamool Congress (TMC) ha Meghalaya bad Myntri Rangbah barim ka Jylla u Mukul Sangma u la ong ba ka jingïatreilang hapdeng ka National People’s Party (NPP) ba la ïalam da u Conrad Sangma, Myntri Rangbah bad ka TIPRA Motha jong u Pradyot Bikram Manikya Deb Barma kam dei shuh kaba dang thymmai bad kin dang ïai bteng ban trei lang ryngkat.
Haba kynthoh ïa ka jingkylli halor ka jingthaw ïa ka North East Front, u Mukul u la ong, “Kam dei shuh kaba dang thymmai, u Conrad Sangma bad u Pradyot ki dei kiba la ïadonlang… ki ïadonlang bad nga tip ba kin ïalong kawei.”
U la bynrap ruh ba ki sngi ban nang wan nangne shakhmat kin sa pynmih bun ki jingpynkyndit, da kaba kdew ruh halor ka jingkynriah ki seng saiñ pyrthei hapoh ka thaiñ.
U Mukul u la kynnoh ba ka Meghalaya Democratic Alliance (MDA) ka Sorkar kaba la pynbit pynbiang da ka BJP bad kam ruh ba ki dei kiba ïatreilang. “Kane ka Sorkar ka dei kaba la pynïeng da ka BJP, kumta ki dang dei ki bynta jong ka BJP… ki ïa long kawei,” u la ong bad ai jingmut ruh ba ka jingkylli halor ka jingleh jngai na ka BJP ka dei ban dei beit ïa ki hi.
Ha kaba ïadei bad ka jingkhot ban pynïasoh bad ka North East Front, u Mukul u la ong, “Haduh mynta em, nga shu ïoh sngew ba ki ïakren, kan long tang kum ka jingpynlut kai ïa ka por ka jong ki.”
